ప్రపంచ ఆర్థిక వ్యవస్థకు పెను ముప్పు-ఆ జలసంధిని కూడా మూసేస్తాం: ఇరాన్ వార్నింగ్..!!
ఇజ్రాయెల్-ఇరాన్ మధ్య ఉద్రిక్తతలు మరింత ప్రమాదకర దశకు చేరుకుంటున్నాయి. ఇప్పటికే హోర్ముజ్ జలసంధి విషయంలో ప్రపంచాన్ని ఆందోళనకు గురిచేసిన ఇరాన్.. ఇప్పుడు మరో కీలక సముద్ర మార్గం 'బాబ్ అల్-మందబ్' జలసంధిని కూడా మూసివేస్తామని హెచ్చరించడం అంతర్జాతీయంగా కలకలం రేపుతోంది. ఇజ్రాయెల్ తమపై దాడులను మరింత తీవ్రతరం చేస్తే ఈ కీలక సముద్ర మార్గాన్ని పూర్తిగా అడ్డుకుంటామని ఇరాన్ సుప్రీం లీడర్కు సీనియర్ సలహాదారుగా ఉన్న అలీ వెలాయతి ఘాటుగా హెచ్చరించారు.
ఇరాన్ నుంచి క్షిపణి దాడులు జరిగినట్లు ఆరోపించిన ఇజ్రాయెల్..భారీ స్థాయిలో ప్రతీకారం తప్పదని ప్రకటించింది. దీనికి స్పందించిన అలీ వెలాయతి..బాబ్ అల్-మందబ్ ప్రాంతంలోని భద్రతా పరిస్థితులను ఇజ్రాయెల్ తప్పుగా అర్థం చేసుకోకూడదన్నారు. ఇప్పటికే హార్ముజ్ జలసంధి మూసివేతతో ప్రపంచదేశాలు ఇబ్బందులు ఎదుర్కుంటున్నాయని గుర్తు చేసిన వెలాయతి.. ఇజ్రాయిల్ దాడులు ఆపకుంటే బాబ్-అల్-మందబ్ జలసంధిని కూడా మూసివేస్తామని తీవ్ర హెచ్చరికలు జారీ చేశారు.
ప్రపంచ వాణిజ్యానికి గుండెకాయలా 'బాబ్ అల్-మందబ్'
యెమెన్, జిబౌటి, ఎరిట్రియా దేశాల మధ్య ఉన్న బాబ్ అల్-మందబ్ జలసంధి.. ప్రపంచంలో అత్యంత రద్దీగా ఉండే సముద్ర మార్గాల్లో ఒకటి. ఇది ఎర్ర సముద్రాన్ని సూయజ్ కాలువతో కలుపుతూ యూరప్, ఆసియా, అరబ్ దేశాల మధ్య వాణిజ్యానికి కీలక ద్వారంగా పనిచేస్తోంది. కేవలం 29 కిలోమీటర్ల వెడల్పు మాత్రమే ఉన్న ఈ ప్రాంతం గుండా ప్రపంచ సముద్ర వాణిజ్యంలో దాదాపు 15 శాతం రవాణా జరుగుతుంది.
ఈ మార్గం మూసివేస్తే ప్రపంచ ఆర్థిక వ్యవస్థపై తీవ్ర ప్రభావం పడే అవకాశం ఉంది. ముఖ్యంగా చమురు, గ్యాస్ సరఫరాలపై భారీ ప్రభావం పడుతుంది. ఇప్పటికే 2023లో గాజా యుద్ధం తర్వాత యెమెన్లోని హౌతీ తిరుగుబాటుదారులు ఈ మార్గంలో వెళ్లే వాణిజ్య నౌకలపై దాడులు చేయడంతో అనేక షిప్పింగ్ కంపెనీలు ప్రత్యామ్నాయ మార్గాలను ఎంచుకున్నాయి. దీంతో ప్రయాణ సమయం పెరగడంతో పాటు ఇంధనం, బీమా, సిబ్బంది ఖర్చులు భారీగా పెరిగాయి. పరిశ్రమ అంచనాల ప్రకారం ఈ అంతరాయం వల్ల ప్రపంచానికి ఏటా సుమారు 20 బిలియన్ డాలర్ల నష్టం వాటిల్లినట్లు తెలుస్తోంది.
హౌతీల ద్వారా ఇరాన్ వ్యూహం?
యెమెన్లో ఇరాన్ మద్దతు ఉన్న హౌతీ మిలిటెంట్లను ఉపయోగించి బాబ్ అల్-మందబ్లో నౌకా రవాణాను అడ్డుకునే అవకాశం ఉందని అంతర్జాతీయ విశ్లేషకులు భావిస్తున్నారు. ఇప్పటికే హోర్ముజ్ జలసంధిపై ప్రభావం చూపిన ఇరాన్.. ఇప్పుడు మరో కీలక మార్గంపై కూడా ఒత్తిడి తీసుకురావడం ప్రపంచ దేశాలను ఆందోళనకు గురిచేస్తోంది.
ప్రపంచ వాణిజ్యానికి కీలకమైన సముద్ర మార్గాలు యుద్ధ రాజకీయాలకు బలవుతుండటం గ్లోబల్ ఆర్థిక వ్యవస్థకు పెద్ద ముప్పుగా మారుతోంది. ఇజ్రాయెల్-ఇరాన్ మధ్య పెరుగుతున్న ఈ ఘర్షణ ఎటు దారి తీస్తుందోనన్న భయం అంతర్జాతీయ సమాజాన్ని వెంటాడుతోంది. ఒకవేళ బాబ్ అల్-మందబ్ జలసంధి మూసివేత నిజమైతే.. ప్రపంచ వ్యాప్తంగా చమురు ధరలు, సరకు రవాణా ఖర్చులు భారీగా పెరిగే ప్రమాదం ఉందని నిపుణులు హెచ్చరిస్తున్నారు.
Click it and Unblock the Notifications
Sign in with Google