పెద్ద తలకాయకే గురి పెట్టారు..డెడ్లీ అటాక్
Netanyahu: ఇజ్రాయెల్పై హెజ్బొల్లా ప్రతీకార దాడికి దిగింది. డ్రోన్లతో విరుచుకుపడుతోంది. లెబనాన్ సహకారంతో భారీ దాడులకు పాల్పడుతోంది. ఏకంగా ఆ దేశ ప్రధానమంత్రి బెంజమిన్ నెతన్యాహును లక్ష్యంగా చేసుకుని ఈ దాడులకు తెగబడింది. ఈ విషయాన్ని ఇజ్రాయెల్ ధృవీకరించింది.
ఈ మధ్యకాలంలో వరుసగా ఎదురుదెబ్బలను తింటోన్న హెజ్బొల్లా- కొంత విరామం తరువాత భారీ దాడులు చేపట్టడం ప్రాధాన్యతను సంతరించుకుంది. ఇజ్రాయెల్ దాడుల్లో హెజ్బొల్లా, హమాస్ అధినేతలు ఇస్మాయిల్ హనియే, యాహ్యా సిన్వర్ వంటి అసాధారణ నాయకులు ఇటీవలే మరణించిన విషయం తెలిసిందే.
మూడు నెలల కిందట ఇరాన్ రాజధాని టెహ్రాన్లో ఇస్మాయిల్ హనియేను మట్టుబెట్టింది ఇజ్రాయెల్. రెండు రోజుల కిందటే గాజాలోని రఫా జిల్లాలో యాహ్యా సిన్వర్ను హతమార్చింది. దీని తరువాత ఈ రెండు మిలిటెంట్ గ్రూపులు కూడా ఇప్పట్లో కోలుకోలేకపోవచ్చని భావించినప్పటికీ- వాస్తవ పరిస్థితి దీనికి భిన్నంగా ఉంటోంది.
ఏకంగా బెంజమిన్ నెతన్యాహును లక్ష్యంగా చేసుకుంది హెజ్బొల్లా. ఆయన స్వస్థలం కేసారియాపై డ్రోన్లతో విరుచుకుపడింది. ఆయన నివాసం సమీపంలో బాంబుల వర్షాన్ని కురిపించింది. ఈ దాడులను నెతన్యాహు కార్యాలయం ధృవీకరించింది కూడా. ఓ అధికారిక ప్రకటనను విడుదల చేసింది.
మానవ రహిత ఏరియల్ వెహికల్ ద్వారా ఈ దాడులు జరిగినట్లు వెల్లడించింది. ఆ సమయంలో నెతన్యాహు గానీ, ఆయన భార్య సారా నెతన్యాహు గానీ నివాసంలో లేరని పేర్కొంది. ఇప్పటివరకు ఎవరికీ ఎలాంటి ప్రాణాపాయం గానీ, గాయాలు గానీ కాలేదని వివరించింది.
మొత్తం మూడు మానవ రహిత ఏరియల్ వెహికల్స్తో ఈ దాడులు జరిగినట్లు నెతన్యాహు కార్యాలయం తెలియజేసింది. అందులో ఒకటి మాత్రమే బాంబులను జారవిడిచిందని, మిగిలిన రెండింటినీ ఇజ్రాయెల్ డిఫెన్స్ ఫోర్సెస్ కూల్చివేయగలిగాయని పేర్కొంది. ఈ దాడులను ఎవరు చేశారనే విషయంపై ఎలాంటి వ్యాఖ్యలు చేయలేదు.
ఈ దాడులను హెజ్బొల్లా చేసినట్లు ఇస్లామిక్ రిపబ్లిక్ న్యూస్ ఏజెన్సీ (ఐఆర్ఎన్ఏ) వెల్లడించింది. ఇజ్రాయెల్కు చెందిన హీబ్రూ మీడియాను ఉటంకించింది. యాహ్యా సిన్వర్, ఇస్మాయిల్ హనియే హత్యోదంతాల అనంతరం ఇజ్రాయెల్- లెబనాన్, ఇజ్రాయెల్- గాజా సరిహద్దుల్లో యుద్ధ వాతావరణం నెలకొన్నట్లు పేర్కొంది.
Click it and Unblock the Notifications
Sign in with Google