షాకింగ్ : ప్యాంటులో ఈ-సిగరెట్ పేలింది..

న్యూయార్క్ లోని గ్రాండ్ సెంట్రల్ షాపింగ్ మాల్‌లో షాపింగ్ చేస్తున్న ఓ వ్యక్తి ప్యాంటు జేబులో ఈ-సిగరేట్ పేలింది.

న్యూయార్క్: సిగరెట్ తాగే అలవాటును మానుకోవాలనుకునేవారు.. ఈ-సిగరెట్స్ కాల్చడం కామన్. సిగరెట్ తాగిన ఫీల్‌తో పాటు.. ఆరోగ్యంపై అంతగా ప్రభావం చూపదు కాబట్టి.. ఈ-సిగరెట్స్ ను చాలామంది కాలుస్తుంటారు. అయితే న్యూయార్క్ లో జరిగిన ఓ ఘటన గురించి తెలిస్తే మాత్రం.. ఈ-సిగరెట్ కూడా డేంజరే అనకమానరు.

ఇంతకీ విషయమేంటంటే.. న్యూయార్క్ లోని గ్రాండ్ సెంట్రల్ షాపింగ్ మాల్‌లో షాపింగ్ చేస్తున్న ఓ వ్యక్తి ప్యాంటు జేబులో ఈ-సిగరేట్ పేలింది. ఒక్కసారిగా పేలుడు చోటు చేసుకోవడంతో.. చుట్టున్నవారంతా పరుగులుపెట్టారు. పేలుడు దాటికి సదరు బాధితుడి చేతులకు గాయాలయ్యాయి. పేలుడుతో కూడిన మంటలు ఒక్కసారిగా అతని ప్యాంటు నుంచి వెలువడ్డాయని సెంట్రల్ సెల్లార్స్ ఉద్యోగి జాన్ లీ తెలిపారు.

పేలుడు తర్వాత హుటాహుటిన బాధితుడిని ఒక ప్రైవేటు అంబులెన్స్ కు తరలించారు. అయితే బాధితుడికి స్వల్ప గాయాలు మాత్రమే అయినట్టు వైద్యులు చెప్పారు. మాల్ లో జరిగిన ఈ ప్రమాదం వల్ల.. షాపింగ్ చేసే వ్యక్తులకు గానీ, మాల్ కు గానీ ఎలాంటి ఆటంకం కలగలేదని షాపింగ్ మాల్ యాజమాన్యం తెలిపింది.

కాగా, ఈ-సిగరెట్లను ప్యాక్ చేసుకుని ప్రయాణించడాన్ని నిషేధిస్తూ గతేడాది కొత్త నిబంధన అమలులోకి తెచ్చింది అక్కడి ప్రభుత్వం. ఏదేమైనా పొగరాయుళ్లు ఈ-సిగరెట్ పట్ల అప్రమత్తంగా వ్యవహరించాల్సిందే.

English summary

An e-cigarette exploded in the pocket of an employee at a New York City wine store Wednesday, badly burning the man, his attorney said.