ఆన్లైన్ డేటింగ్ సైట్ల ద్వారా శృంగారం: హెచ్ఐవీ, జేబుకు చిల్లు
న్యూఢిల్లీ: ఆన్లైన్లో మీకు సరైన జోడీని వెతుక్కోండి అంటూ డేటింగ్ వెబ్సైట్లు వల విసురుతుంటాయి. అలా చెప్పే సైట్లన్నీ మోసపూరితమైనవంటూ ఓ అధ్యయనంలో వెల్లడైంది. ఆన్లైన్ డేటింగ్ వెబ్ సైట్ల ద్వారా జేబులకు చిల్లు పడటంతో పాటు, ప్రాణాంతకమైన వ్యాధుల వ్యాప్తికి కారణమవుతున్నాయని చెబుతోంది.
ఇద్దరి అంగీకారంతో శృంగారానికి వీలు కల్పించే ఈ డేటింగ్ వెబ్సైట్లు, తద్వారా హెచ్ఐవీ, ఇతర సుఖవ్యాధులకు సంబంధించిన వైరస్లను వ్యాపింపజేస్తున్నాయని ఈ అధ్యయనంలో పాలుపంచుకున్న ప్రొఫెసర్ రీతు అగర్వాల్ (రాబర్ట్ హెచ్స్మిత్ బిజినెస్ స్కూల్) తెలిపారు.
ఫ్లోరిడాలో నాలుగేళ్ల వ్యవధిలో హెచ్ఐవీ కేసుల సంఖ్య 13.5 శాతం పెరుగడానికి క్రెయిగ్ లిస్ట్ అనే అడల్డ్ డేటింగ్ వెబ్సైట్ కారణమయిందని ఈ అధ్యయనంలో వెల్లడైంది. ఈ డేటింగ్ వెబ్సైట్ ద్వారా ఎవరైతే శృంగారంలో కలిశారో వారిలో అత్యధికులకు హెచ్ఐవీ సోకినట్లు అధ్యయనంలో పేర్కొంది.
హెచ్ఐవీ నిర్మూలనకు ప్రపంచ వ్యాప్తంగా ఎన్నో దేశాలు ఎన్నో కార్యక్రమాలు చేపడుతున్నా, ఇలాంటి వెబ్సైట్లు మాత్రం మొత్తం వ్యవస్ధనే మార్చేస్తున్నాయని, ఈ శృంగార విషయాల్లో ప్రజలు అప్రమత్తంగా ఉండాలని అగర్వాల్ తెలిపారు.