Google Pay: గూగుల్ పేలో భారీగా క్యాష్ బ్యాక్.. ఏకంగా రూ. 87,800 రాక..

యూపీఐ చెల్లింపుల సంస్థ గూగుల్ పే (Google Pay) వినియోగదారులు గత కొన్ని రోజులుగా భారీ మొత్తంలో క్యాష్ బ్యాక్ పొందుతున్నారు. వినియోగదారు $1072 (రూ. 87,800) అందుకున్నట్లు సోషల్ మీడియా ద్వారా తెలిపారు. అయితే కంపెనీ వెంటనే లోపాన్ని గుర్తించి, క్రెడిట్ చేసిన మొత్తాలను సాధ్యమైన చోట వెనక్కి తీసుకుందని చెబుతున్నారు. గూగుల్ పే లో సాంకేతిక లోపం కారణంగానే ఈ పరిణామం చోటు చేసుకుని ఉండవచ్చని అంటున్నారు.

ముఖ్యంగా డాగ్‌ఫుడింగ్ అనే ఫీచర్‌ పరీక్షిస్తున్న సమయంలో ఈ పొరబాటు దొర్లినట్టు ప్రాథమికంగా సమాచారం. కంపెనీ కొత్త ఫీచర్‌ టెస్టింగ్‌ సందర్భంగా తమ ఉద్యోగులకు చెల్లించే బదులు అనుకోకుండా నగదును కొంతమంది యూజర్లకు పంపించినట్టు తెలుస్తోంది. తమకు భారీగా డబ్బులు వచ్చినట్టు మిషాల్ రెహమాన్ అనే జర్నలిస్ట్ సహా కొంతమంది రెడిట్‌ యూజర్లు సోషల్ మీడియాలో పోస్ట్ పెట్టారు.

రెహమాన్ మరొక ట్వీట్‌లో కంపెనీ నుంచి అందుకున్న ఇమెయిల్‌ను పంచుకున్నారు. ఇది లోపాన్ని అంగీకరించింది. కొన్ని సందర్భాల్లో చెల్లింపులు రివర్స్ అవుతున్నాయని పేర్కొన్నాడు. ఈ నగదు జమ గూగుల్‌ పిక్సెల్‌ వినియోగదారులకు పరిమితమైందా? లేక ఇతర ఆండ్రాయిడ్‌ ఫోన్లనుకూడా ప్రభావితం చేసిందా అనేది కూడా స్పష‍్టత రాలేదు. గూగుల్ కొంత మంది యూజర్లను మెయిల్‌ ద్వారా సంప్రదించింది వీలైనంత సొమ్మును వెనక్కి తీసుకున్నట్లు తెలుస్తోంది. క్యాష్ బ్యాక్ వచ్చిన డబ్బు వాడుకున్నా, ఇతర అకౌంట్ లోకి ట్రాన్స్ ఫర్ చేసినా వారి నుంచి ఎలాంటి చర్యలు తీసుకోలేమని గూగుల్ పేర్కొంది. ఈ విషయమై ఎలోన్ మస్క్ కూడా స్పందించారు.

English summary

Users of UPI payments company Google Pay have been getting huge amount of cash back for the past few days.