రహదారిపై సినీఫక్కీలో పోలీసుల ఛేజ్.. చివరికి ఘోర ప్రమాదం!
వాషిగ్టన్: అమెరికాలోని అరిజోనా రాష్ట్రంలో పోలీసులు ఓ నిందితుడి కారును సినీఫక్కీలో ఛేజ్ చేశారు. రహదారిపై కొన్ని కిలోమీటర్ల దూరం కొనసాగిన ఈ ఛేజింగ్లో చివరికి నిందితుడి కారు అనూహ్యంగా ప్రమాదానికి గురైంది.
ఈ ఘటనకు సంబంధించిన వీడియోను తాజాగా అక్కడి పోలీసులు విడుదల చేశారు. ఇందులో ఎరుపు రంగు ఎస్యూవీలో నిందితుడు పారిపోతుండగా.. వెనక పోలీస్ వాహనం వెంబడిస్తూ కనిపిస్తుంది.
అయితే నిందితుడు పోలీసులకు దొరకకుండా కొన్ని కిలోమీటర్లు తప్పించుకోగలిగాడు. కానీ ఓ చౌరస్తా వద్ద రెడ్ సిగ్నల్ పడడం అతడి కొంపముంచింది. కొన్ని క్షణాలపాటు ఆ చౌరస్తాలో తన కారును ఆపిన నిందితుడు పోలీసుల వాహనం సమీపించడంతో గాభరాపడి మళ్లీ కారును ముందుకురికిస్తాడు.
ఆ తరువాత కాసేపటికే మరో కారుని ఢీకొడతాడు నిందితుడు. తెలుపు రంగు కారును తప్పించినప్పటికీ నలుపురంగు ఎస్యూవీని ఢీకొట్టేస్తాడు. దీంతో నిందితుడి కారుతోపాటు అతడు ఢీకొట్టిన ఎస్యూవీ ముందు భాగం కూడా ధ్వసం అవుతుంది.
ఈ ప్రమాదంలో ఎరుపు రంగు కారులోని నిందితుడికి స్వల్పగాయాలు కాగా, అతడు ఢీకొట్టిన ఎస్యూవీలోని మహిళ(47)కు తీవ్రగాయాలయ్యాయి. పోలీసులు ఆమెను చికిత్స నిమిత్తం ఆసుపత్రికి తరలించారు. సదరు నిందితుడిపై పలు కేసులు ఉన్నట్లు అక్కడి పోలీసులు తెలిపారు.