లైవ్ లో జంప్ చేస్తూ పైలట్ దుర్మరణం (వీడియో)
లండన్: అకాశంలో వింగ్ సూట్ జంప్ చేస్తూ ఇతరులతో పంచుకోవడానికి ప్రయత్నించిన ఓ ఇటాలియన్ పైలట్ ప్రమాదవశాత్తు ప్రాణాలు కొల్పోయాడు. డేరింగ్ జంప్ ను సోషల్ మీడియాలో ప్రసారం చేస్తుండగానే ఆర్మిన్ చెమీడర్ (28) ప్రాణాలు విడిచాడు.
స్విట్జర్లాండ్ లోని కాండెర్ స్టెగ్ సమీపంలోని ఓ పర్వతం నుంచి ఉత్సాహంగా జంప్ చేసిన ఆర్మిన్ మృత్యువాత పడ్డాడు. పర్వతం పై నుంచి మీరు నాతో జంప్ చేయొచ్చు అని పేర్కొంటూ ఆర్మీన్ కిందకు దూకాడు.
ఆ సమయంలో ఆ హర్రర్ వీడియో చూస్తున్న ప్రేక్షకులు అతను పడిపోతున్న శబ్దాలు విని షాక్ కు గురైనారు. వెంటనే అతడికి ఫేస్ బుక్ లో సందేశాలు పంపించారు. ఆర్మిన్ నుంచి ఎలాంటి స్పందన లేకపోవడంతో అతను మరణించాడని స్పష్టం అయ్యింది.
కాండెర్ స్టెగ్ సమీపంలోని పాపులర్ బేస్ జంపింగ్ లోకేషన్ లో ఆర్మిన్ మృతదేహాన్ని గుర్తించామని పోలీసు అధికారులు చెప్పారు. అయితే ప్రమాదానికి కచ్చితమైన కారణాలు తెలియడం లేదని అధికారులు అన్నారు. ఈ వైరల్ వీడియో సోషల్ మీడియాలో హల్ చల్ చేస్తున్నది.