సన్యాసులకు అందాల పోటీలు, కానీ భిన్నంగా..
టోక్యో: అమ్మాయిల అందాల పోటీలు మనకు తెలుసు. అబ్బాయిల హ్యాండ్సమ్ పోటీలను కూడా మనం చూస్తున్నాం. ఇప్పుడు సన్యాసులు కూడా అందాల పోటీలు నిర్వహించడం గమనార్హం. అయితే, ఈ పోటీ బాహ్య సౌందర్యానికి సంబంధించినది కాదు. లోపలి సౌందర్యం గురించి.
ఈ అంతర్లీన అందాల పోటీలు జపాన్లో జరిగాయి. ఇవి బౌద్ధ సన్యాసులకు జరిగాయి. సన్యాసుల్లో దాగి ఉన్న గొప్ప విషయాలను, మంచితనాన్ని తెలియజేసే ఉద్దేశ్యంతో ఈ పోటీలు నిర్వహించినట్లు చెప్పారు.
ఇందులో భాగంగా విభిన్నమైన ప్రశ్నలు అడగటం, వాటి సమాధానాలు రాబట్టటం చేశారు. అంతేకాదు వారిలోని శక్తి సామర్థ్యాన్ని బయటపెట్టడానికి రాళ్లను పగలగొట్టడం, వివిధ భంగిమల్లో ఆసనాలు వేయించడం కూడా చేశారు.
ఈ పోటీలకు జపాన్లో సన్యాసుల నుంచి మంచి స్పందన వచ్చింది. ఫైనల్ పోటీలకు అయిదుగురు అర్హత సాధించారు. అనంతరం వారి సామర్థ్యాలను బట్టి బహుమతులు ప్రదానం చేశారు. ఈ పోటీలు నిర్వహించడం ఇది రెండోసారి. గత ఏడాది కూడా నిర్వహించారు.