లండన్‌లో నగ్న రెస్టారెంట్‌: రేపే ప్రారంభం (ఫోటోలు)

By Nageswara Rao

Updated: Saturday, June 11, 2016, 15:54 [IST]

లండన్: పూర్తిస్థాయి సహజత్వాన్ని కోరుకునే వారు కట్టుబాట్లను పక్కనబెట్టి ఎంచక్కా నచ్చినట్లు నగ్నంగా భోజనం చేసేందుకు లండన్‌లో ఓ రెస్టారెంట్ ప్రారంభమైంది. దీని పేరు 'బునియాది'. హిందీలో 'ప్రాథమికం' అని అర్థం వచ్చే బునియాదీ అనే పదం ఆధారం గానే ఈ పేరు పెట్టారు.

ఈ నగ్న రెస్టారెంట్‌లో తప్పదనుకుంటే పొదుపుగా దుస్తులను వేసుకునే వారి కోసం ప్రత్యేకమైన ఏర్పాట్లు చేశారు. శనివారం (జూన్ 11)న ప్రారంభ కానున్న ఈ రెస్టారెంట్‌లో భోజనం చేసేందుకు గాను ఇప్పటికే 44 వేల మంది వరకు పైగా పేర్లు నమోదు చేసుకున్నారు.

అయితే ఈ రెస్టారెంట్‌లో ఒకేసారి కేవలం 42 మంది మాత్రమే కూర్చునే సదుపాయం మాత్రమే ఉంది. కేవలం 3 నెలలు మాత్రమే ఈ రెస్టారెంట్‌ను నడిపేందుకు లండన్ అధికారులు అనుమతి ఇచ్చారు. ఈ రెస్టారెంట్ ప్రత్యేకత ఏంటంటే శాఖాహార, మాంసాహార వంటకాలను మట్టికుండల్లో అందిస్తారు.

అంతేకాదు తినేటటువంటి చెంచాలతో వడ్డిస్తారు. ఈ చెంచాలను ఆహార పదార్ధాలతోనే తయారు చేయడంతో వాటిని కూడా మనం తినేయొచ్చు. ఆధునిక సమాజంలో ఆహారం కలుషితం అవుతున్న నేపథ్యంలో రసాయనాలులేని వంటలు ఈ రెస్టారెంట్ ప్రత్యేకత.

విద్యుత్, ఫోన్, దుస్తులు ఇలా ఎలాంటివి లేని ప్రపంచాన్ని పరిచయం చేయడం కోసమే దీనిని నెలకొల్పినట్లు రెస్టారెంట్ మాతృసంస్థ అయిన 'లాలీపాప్' వ్యవస్థాపకుడు సెబ్ లేయాల్ ప్రకటించారు. శనివారం ప్రారంభంకానున్న ఈ రెస్టారెంట్‌లో పూర్తి నగ్నంగా ఉండే కస్టమర్ల అభిరుచికి తగ్గట్లుగా ఇంటీరియర్‌ను ప్రత్యేకంగా డిజైన్ చేశారు.

కొవ్వొత్తుల కాంతుల్లో, వెదురు కర్రలతో రూపొందించిన ఈ రెస్టారెంట్ ఇప్పుడు ప్రపంచ వ్యాప్తంగా వార్తల్లోకెక్కింది. ఈ రెస్టారెంట్‌కు సంబంధించిన కొన్ని ఫోటోలను సోషల్ మీడియా వెబ్‌సైట్ ఫేస్‌బుక్‌లో పోస్టు చేశారు. నగ్నంగా ఉండాలనుకునే వారికి ఈ రెస్టారెంట్ ఓ కొత్త అనుభూతిని ఇస్తుందని ఆయన పేర్కొన్నారు.