హీరో ప్రభాస్ అంటే ఇష్టం: మిస్ అమెరికా నీనా దవులూరి

న్యూయార్క్: మిస్ అమెరికాగా ఎంపికైన తెలుగు అమ్మాయి నీనా దవులూరికి హీరో ప్రభాస్ అంటే ఇష్టమట. వర్షం సినిమా చూసి ప్రభాస్‌ అభిమానిగా మారిందట. 'వర్షం' సినిమా చూసి ప్రభాస్ అభిమానిని అయ్యానని 2007లో భారతదేశానికి వచ్చినప్పుడు ఆమె ఒక ఇంటర్వ్యూలో తెలిపింది.

నీనా దావులూరి తల్లిదండ్రులు దావులూరి కోటేశ్వరరావు చౌదరి, షీలారంజని. వీరి స్వస్థలం కృష్ణా జిల్లా విజయవాడ. నీనా తండ్రి కోటేశ్వరరావు గైనకాలజిస్ట్. వృత్తిరీత్యా 1981లో ఆయన అమెరికాలోని మిస్సోరీకి చేరుకున్నారు. 1989, ఏప్రిల్ 20న నీనా సెరీక్యూజ్‌లో జన్మించింది. ఆమె సోదరి పేరు మీనా. నాలుగేళ్ల వయసులో వీరి కుటుంబం ఒక్లహామాకు, మిషిగాన్‌కు మారింది.

నీనా కాలేజీ చదువు మిషిగాన్‌లోనే సాగింది. 'బెయిన్ బిహేవియర్ అండ్ కాగ్నిటివ్ సైన్స్'లో డిగ్రీ పొందింది. చదువుల్లోనూ నీనాది అగ్రస్థానమే. విద్యాపరంగా తన ప్రతిభతో ఆమె మిషిగాన్ మెరిట్ అవార్డ్, నేషనల్ ఆనర్ సొసైటీ అవార్డ్ వంటి పలు అవార్డులను సాధించింది. నీనా బంధుమిత్రుల్లో చాలా మంది వైద్యులే. నీనా సోదరి మీనా కూడా వైద్య విద్యార్థే.

నీనా 'కార్డియాలజిస్టు' కావడమే తన లక్ష్యంగా పెట్టుకుంది. ఆమెకు కూచిపూడి, భరత నాట్యాల్లో ప్రవేశం కూడా ఉంది. తెలుగు సినిమాలు చూడటం అంటే ఆమెకు చాలా ఇష్టం. ఒకప్పుడు ఆమె బులీమియా (అధికంగా తిండి తినడం)తో బాధపడేదని, దానివల్ల చాలా బరువు పెరిగిందని, ఆ తర్వాత కష్టపడి వర్కవుట్లు చేసి నాజూగ్గా తయారైందని సెరీక్యూజ్ డాట్ కామ్ అనే వెబ్‌సైట్ చెప్పింది.

English summary

Miss America is the fan of Telugu film hero Prabhas. She likes to see Telugu films.