పాకిస్తాన్ ‘డెడ్ లైన్’.. వణుకుతున్న ఐఎస్ఐ అగ్రనేతలు!

పాకిస్తాన్‌ను శాసిస్తున్న రెండు అత్యంత శక్తివంతమైన శక్తులు.. ఆ దేశ సైన్యం, గూఢచారి విభాగం ఐఎస్ఐ (ISI) మధ్య ఇప్పుడు 'కోల్డ్ వార్’ పతాక స్థాయికి చేరింది. సరిహద్దుల్లో వరుస వైఫల్యాలు, అంతర్గతంగా పెరుగుతున్న ఉగ్రదాడులు పాక్ భద్రతా కోటను బద్ధలు కొడుతుంటే, ఇప్పుడు ఆ నెపం ఒకరిపై ఒకరు నెట్టుకుంటూ వ్యవస్థల మధ్య యుద్ధం మొదలైంది.

మార్చి 20, 2026 నాటికి అందిన సమాచారం ప్రకారం, ఆర్మీ చీఫ్ జనరల్ అసిమ్ మునీర్ ఐఎస్ఐ పనితీరుపై తీవ్ర అసంతృప్తితో ఉన్నారని, ఏ క్షణమైనా ఆ సంస్థలో భారీ ప్రక్షాళన జరగవచ్చని నివేదికలు స్పష్టం చేస్తున్నాయి. నిఘా వైఫల్యాల వల్ల పాక్ జవాన్లు భారీగా ప్రాణాలను కోల్పోతుండటంతో మునీర్ తన సహనాన్ని కోల్పోయినట్లు తెలుస్తోంది.

మునీర్ ఆగ్రహం.. ఐఎస్ఐలో వణుకు..

ఇటీవల జరిగిన ఉన్నత స్థాయి సమావేశంలో ఆర్మీ చీఫ్ అసిమ్ మునీర్ అధికారులకు 'షాక్ ట్రీట్‌మెంట్’ ఇచ్చినట్లు సమాచారం. "గ్రౌండ్ రిపోర్ట్స్ చూపండి.. లేదంటే మీ పదవులను వదులుకోండి" అంటూ ఆయన నేరుగా ఐఎస్ఐ, మిలటరీ ఇంటెలిజెన్స్ అధికారులను హెచ్చరించినట్లు తెలుస్తోంది. పశ్చిమ సరిహద్దులో అఫ్ఘానిస్థాన్‌తో దాదాపు యుద్ధ వాతావరణం నెలకొన్నా, బలోచిస్తాన్‌లో తిరుగుబాటు మళ్లీ చెలరేగుతున్నా.. ఐఎస్ఐ ముందస్తు సమాచారం ఇవ్వడంలో ఘోరంగా విఫలమైందని ఆయన ఆగ్రహం వ్యక్తం చేశారు. ముఖ్యంగా టీటీపీ (TTP) ఉగ్రవాదులు సైన్యం కదలికలను అడ్డుకోవడానికి చెక్‌పోస్టులు కూడా ఏర్పాటు చేయడం పాక్ నిఘా వ్యవస్థ పనితీరును వెక్కిరిస్తోంది.

లక్ష్యం తప్పిన దాడులు - పౌర మారణహోమం..

అఫ్ఘానిస్థాన్ సరిహద్దుల్లో పాకిస్తాన్ నిర్వహిస్తున్న సైనిక చర్యలు కూడా ఎదురుదెబ్బలు తింటున్నాయి. అగ్రశ్రేణి ఉగ్రవాద నాయకులను మట్టుబెట్టడంలో విఫలమవడమే కాకుండా, పాక్ జరిపిన దాడులు సామాన్య పౌరుల ప్రాణాలు తీస్తున్నాయి. ఈ వారం ప్రారంభంలో కాబూల్‌లోని ఒక డ్రగ్ పునరావాస ఆసుపత్రిపై పాక్ వైమానిక దాడులు జరగడం అంతర్జాతీయంగా కలకలం రేపింది. ఈ ఘటనలో సుమారు 400 మంది అమాయక పౌరులు మరణించడం పాకిస్తాన్‌ను ఆత్మరక్షణలో పడేసింది. సరైన ఇంటెలిజెన్స్ సమాచారం లేకుండా దాడులు జరపడం వల్లే ఇన్ని ప్రాణాలు పోయాయని, ఇది సమస్యను పరిష్కరించడానికి బదులు అఫ్ఘాన్-పాక్ మధ్య శతృత్వాన్ని మరింత పెంచిందని నిపుణులు విశ్లేషిస్తున్నారు.

చితికిపోతున్న వ్యవస్థ.. అనిశ్చితిలో భవిష్యత్తు..

ఒకవైపు సరిహద్దు ఉద్రిక్తతలు, మరోవైపు అంతర్గత తిరుగుబాట్లు.. వీటి మధ్య సమన్వయం కోల్పోయిన పాక్ నిఘా యంత్రాంగం తీవ్ర ఒత్తిడిలో కొట్టుమిట్టాడుతోంది. ఆర్మీ చీఫ్ హెచ్చరికలు ఐఎస్ఐలోని సీనియర్ అధికారులకు మింగుడుపడటం లేదు. త్వరలోనే కీలక పదవుల నుంచి తమను తొలగిస్తారనే భయం వారిలో అసంతృప్తిని పెంచుతోంది. మునీర్ తన పట్టు బిగించాలని చూస్తుంటే, క్షేత్రస్థాయిలో వైఫల్యాలు ఆయన నాయకత్వానికే సవాలుగా మారుతున్నాయి. మొత్తానికి, పాకిస్తాన్ చరిత్రలోనే అత్యంత దారుణమైన భద్రతా సంక్షోభం మరియు అంతర్గత వ్యవస్థల ఘర్షణ ఆ దేశాన్ని వినాశనం వైపు నడిపిస్తున్నట్లు కనిపిస్తోంది.

English summary

Pakistan's Army Chief Gen Asim Munir issues a stern warning to ISI following massive intelligence failures. Tensions rise as the country faces border wars with Afghanistan and internal rebellions.