గ్యాస్ కెమికల్ ప్లాంట్ లో భారీ పేలుడు.. ఏడుగురు మృతి.. 9 మంది గల్లంతు.. 152 మందికి సీరియస్

రష్యాలోని అమూర్ ప్రాంతంలో ఓ గ్యాస్ కెమికల్ కాంప్లెక్స్ లో భారీ పేలుడు సంభవించింది. ఈ ప్రమాదంలో ఏడుగురు మృతి చెందారు. మరో 9 మంది గల్లంతయ్యారు. మృతుల్లో ఆరుగురు చైనీయులు ఉన్నారు. ఈ ప్రమాదానికి సంబంధించిన విషయాలను ఆ ప్లాంట్ తన అధికారిక టెలిగ్రామ్ ఛానెల్ లో వెల్లడించింది. ఈ ప్రమాదంలో ప్లాంట్ లో పనిచేసే 152 మందికి గాయాలైనట్లు పేర్కొంది. వారిలో 36 మందికి తీవ్ర గాయాలు కాగా వారిని సమీప ఆస్పత్రికి తరలించినట్లు తెలిపింది. ఈ ప్రమాద ఘటనను అంతర్జాతీయ మీడియా సంస్థ రాయిటర్స్ ప్రచురించింది. గ్యాస్ కెమికల్ కాంప్లెక్స్ నుంచి దట్టమైన నల్లని పొగలు భారీ స్థాయిలో అక్కడి వాతావరణాన్ని కమ్మేశాయి. దాంతో ఆ ప్రాంతం భయానక వాతావరణంలోకి వెళ్లింది. ఇందుకు సంబంధించిన దృశ్యాలు సామాజిక మాధ్యమాల్లో వైరల్ అవుతున్నాయి.

RUSSIA: A major explosion and fire severely damaged Russia’s Amur Gas Chemical Complex during precommissioning work, shortly before the massive facility was due to open. pic.twitter.com/4am2dcKuuf

— Open Source Intel (@Osint613) August 25, 2026

క్షతగాత్రులను అత్యవసరంగా తరలించేందుకు ఎమర్జెన్సీ సర్వీసెస్ ఎయిర్ క్రాఫ్ట్ ను కూడా ఏర్పాటు చేశారు. ఎయిర్ క్రాఫ్ట్ ద్వారా గాయపడిన కార్మికులను రష్యాలోని వివిధ ఆస్పత్రులకు తరలించి మెరుగైన వైద్యం అందిస్తున్నారు. ఇక ఈ కాంప్లెక్స్ ను రష్యన్ పెట్రో కెమికల్ కంపెనీ సిబుర్ అలాగే చైనీస్ ఆయిల్ అండ్ గ్యాస్ కంపెనీ సినోపెక్ లు సంయుక్తంగా ఆపరేట్ చేస్తున్నాయి. అయితే ఈ కంపెనీ ఇంకా పనులు ప్రారంభించలేదు. త్వరలోనే ఇక్కడ పనులు ప్రారంభం కానున్నాయి. ఇక ఈ ఘటనపై రష్యాకు చెందిన దర్యాప్తు కమిటీ విచారణ చేపట్టింది. ఈ ఘటనతో పారిశ్రామిక రంగంలోని కార్మికుల భద్రతపై మరోసారి ప్రశ్నలు మొదలయ్యాయి.

ఇక ఈ అమూర్ గ్యాస్ కెమికల్ కాంప్లెక్స్ ప్రాజెక్ట్ నిర్మాణంలో గరిష్టంగా దాదాపు 30 వేల మందికి పైగా కార్మికులు పనిచేసినట్లు స్పష్టం అవుతోంది. అలాగే దాదాపు 10 బిలియన్ డాలర్ల వ్యయంతో ఈ ప్రాజెక్టును చేపట్టారు. ఈ ప్రాజెక్ట్ వరల్డ్ లోనే అతిపెద్ద పాలిథిలిన్, పాలీప్రొపైలిన్ తయారీ కేంద్రాల్లో ఒకటిగా ఉంది. ఇది పూర్తిస్థాయిలో కార్యకలాపాలు ప్రారంభిస్తే ఏడాదికి 23 లక్షల టన్నులకు పైగా పాలిథిలిన్ అలాగే 4 లక్షల టన్నుల పాలీప్రొపైలిన్ ఉత్పత్తి కానుంది. ఈ మేరకు సంస్థ లక్ష్యంగా పెట్టుకుంది.