పారిస్: మహిళా ఉగ్రవాది ఆత్మాహుతి, అపార్ట్మెంట్లో ఉగ్రవాది?
ప్యారిస్: ప్యారిస్ సమీపంలోని సెయింట్ డెనిస్లో బుధవారం మహిళా ఉగ్రవాది ఆత్మాహుతికి పాల్పడింది. నాలుగు రోజుల క్రితం ముష్కరుల దాడి నేపథ్యంలో... ఫ్రాన్స్ పోలీసులు పెద్ద ఎత్తున ఉగ్రవాదుల కోసం గాలిస్తున్నారు. బుధవారం పోలీసులు జరిపిన కాల్పుల్లో ఇద్దరు మృతి చెందారు.
ముగ్గురు చనిపోగా, ఓ మహిళ ఆత్మాహుతికి పాల్పడినట్లు పోలీసులు చెప్పారని తెలుస్తోంది. సెయింట్ డెనిస్లో బుధవారం అనుమానిత ఉగ్రవాదులపై పోలీసులు కాల్పులు జరిపారు. ఈ ఘటనలో ముగ్గురు ఉగ్రవాదులు మరణించారు.
మరో ముగ్గురిని పోలీసులు అదుపులోకి తీసుకున్నారు. ఇద్దరు పోలీసులకు గాయాలయ్యాయి. కాగా, గత శుక్రవారం ఫ్రాన్స్ రాజధాని ప్యారిస్లో దాడిలో పాల్గొన్న తొమ్మిది మంది ఉగ్రవాదుల్లో ఎనిమిది మంది ఆ రోజే మృతి చెందారు.
తొమ్మిదో ఉగ్రవాదిగా భావిస్తున్న సల్లాహ్ అబ్దెస్లామ్ పారిస్లోని సెయింట్ డెనిస్ ప్రాంతంలోని ఓ అపార్ట్మెంట్లో తలదాచుకున్నట్లు పోలీసులు భావించారు. ఆ ప్రాంతంలో భద్రతా దళాలు చుట్టుముట్టాయి. ప్యారిస్ ఉత్తర ప్రాంతంలో తనిఖీలు నిర్వహించిన పోలీసులు అనుమానిత వ్యక్తులపై కాల్పులు జరిపారు. ఈ ఘటనలోనే ఇద్దరు మృతి చెందగా, మరో మహిళా ఉగ్రవాది ఆత్మాహుతికి పాల్పడింది.
అంతకుముందు, ప్యారిస్ సమీపంలోని సెయింట్ డెనిస్ బుధవారం కాల్పులు, పేలుళ్లతో దద్దరిల్లింది. ఉగ్రవాదులే లక్ష్యంగా భద్రతా బలగాలు, పోలీసులు దాడులు చేసిన సెయింట్ డెనిస్లో ఏడుచోట్ల కాల్పులు, పేలుళ్ల శబ్దం వినిపించింది. ఈ నెల 13న ఐఎస్ ఉగ్రవాదులు పారిస్లో మారణ హోమం సృష్టించి 129 మందిని హతమార్చిన సంగతి తెలిసిందే. దాడులకు పాల్పడిన ఉగ్రవాదుల కోసం పోలీసులు విస్తృతంగా గాలింపు చేపట్టారు. ఇందులో భాగంగానే సెయింట్ డెనిస్లో పోలీసులు దాడులు చేశారు.