భారీ భూకంపం ధాటికి ఊగిన భవనాలు.. ప్రెసిడెంట్‌కు తృటిలో తప్పిన ప్రమాదం!

మెక్సికోలో శుక్రవారం భారీ భూకంపం సంభవించింది. రిక్టర్ స్కేలుపై దీని తీవ్రత 6.5గా నమోదైందని మెక్సికో జాతీయ భూకంప కేంద్రం వెల్లడించింది. ఈ భూకంపం ధాటికి మెక్సికో సిటీతో పాటు దేశంలోని దక్షిణ, మధ్య ప్రాంతాలు ఒక్కసారిగా వణికిపోయాయి. భవనాలు ఊగిపోవడంతో ప్రజలు భయాందోళనతో రోడ్లపైకి పరుగులు తీశాయి. దక్షిణ రాష్ట్రమైన గెర్రెరోలోని సాన్ మార్కోస్ సమీపంలో, పసిఫిక్ తీర ప్రాంతమైన అకాపుల్కోకు దగ్గరలో భూకంప కేంద్రం ఉన్నట్లు గుర్తించారు. భూమి లోపల సుమారు 21.7 మైళ్ల (35 కిలోమీటర్లు) లోతులో ఈ ప్రకంపనలు మొదలయ్యాయి.

అధ్యక్షురాలి ప్రెస్ మీట్‌లో అలజడి
ఈ భూకంపం సంభవించిన సమయంలో మెక్సికో అధ్యక్షురాలు క్లాడియా షీన్‌బామ్ కొత్త ఏడాదిలో తన తొలి విలేకరుల సమావేశాన్ని నిర్వహిస్తున్నారు. సరిగ్గా ఆమె మాట్లాడుతున్న సమయంలోనే భూకంప హెచ్చరిక సైరన్లు మోగడంతో సమావేశం మధ్యలోనే ఆగిపోయింది. భద్రతా సిబ్బంది అప్రమత్తమై అధ్యక్షురాలిని, జర్నలిస్టులను సురక్షిత ప్రాంతాలకు తరలించారు. కొద్దిసేపటి తర్వాత భూప్రకంపనలు తగ్గడంతో ఆమె తిరిగి వచ్చి ప్రెస్ మీట్‌ను కొనసాగించారు.

మెక్సికో సిటీలోని పలు భవనాలకు స్వల్పంగా పగుళ్లు ఏర్పడ్డాయి. గోడలు బీటలు వారడం, భవనాల పైభాగం నుంచి పెచ్చులు ఊడి పడటం వంటి సంఘటనలు కొన్ని చోట్ల చోటు చేసుకున్నాయి. అయితే ఇప్పటి వరకు ఎటువంటి ప్రాణనష్టం జరిగినట్లు సమాచారం లేదు. అకాపుల్కో, మెక్సికో సిటీలోని హై-రైజ్ భవనాలు ఈ భూకంపం ధాటికి బలంగా కదిలిపోయాయి.

🔴#LATEST — Mexican President Sheinbaum abruptly pauses her press conference as 6.5-magnitude earthquake shakes Mexico City pic.twitter.com/0YRqLo8XPi

— Türkiye Today (@turkiyetodaycom) January 2, 2026

మెక్సికో - భూకంపాల నిలయం
మెక్సికో భౌగోళికంగా పలు టెక్టోనిక్ ప్లేట్ల (భూగర్భ పలకలు) సరిహద్దులో ఉండటం వల్ల ఇక్కడ తరచుగా భూకంపాలు సంభవిస్తుంటాయి. గతంలో 1985, 2017లో వచ్చిన భారీ భూకంపాలు వేలాది మంది ప్రాణాలను బలిగొన్నాయి. తాజా భూకంపం తర్వాత అధికారులు సహాయక చర్యలను ముమ్మరం చేశారు. ప్రజలను అప్రమత్తంగా ఉండాలని సూచించారు.

English summary

A powerful 6.5-magnitude earthquake struck Mexico, shaking buildings across several regions. Panic ensued as tremors interrupted President Claudia Sheinbaum’s press conference. No casualties reported so far.