మూడు నెలల పసిబిడ్డతో కీలక సమావేశానికి మంత్రి.. వీడియో వైరల్ !!
పదవి బాధ్యతలు ఒకవైపు.. తల్లి బాధ్యత మరోవైపు.. ఈ రెండింటినీ సమతుల్యం చేస్తూ ప్రపంచానికి స్ఫూర్తిదాయకమైన సందేశాన్ని ఇచ్చారు స్వీడన్ పర్యావరణ శాఖ మంత్రి రొమినా పౌర్మొఖ్తారీ. లక్సెంబర్గ్లో జరిగిన యూరోపియన్ యూనియన్ (EU) పర్యావరణ మంత్రుల సమావేశానికి ఆమె తన మూడు నెలల కుమారుడు ఆడమ్తో కలిసి హాజరయ్యారు. ఒక చేతిలో అధికారిక పత్రాలు, మరోవైపు తన కుమారుడిని చూసుకుంటూ సమావేశంలో పాల్గొన్న మంత్రి తీరు ఎంతో మందిని ఆకట్టుకుంది. అధికారిక ఈయూ మంత్రుల స్థాయి సమావేశంలో ఓ పసిబిడ్డ పాల్గొనడం ఇదే తొలిసారి కావడంతో ఈ ఘటన ప్రపంచవ్యాప్తంగా చర్చనీయాంశమైంది.
ప్రపంచానికి కొత్త సందేశం..
మాతృత్వ సెలవుల అనంతరం ఇటీవలే విధుల్లో చేరిన రొమినా, కుటుంబం సహకారంతో తన చిన్నారిని సమావేశానికి తీసుకువచ్చారు. వాతావరణ మార్పులు, పర్యావరణ విధానాలు, కార్బన్ ఉద్గారాల నియంత్రణ వంటి కీలక అంశాలపై చర్చలు జరుగుతున్న అత్యున్నత స్థాయి సమావేశంలో ఆమె తన అధికారిక బాధ్యతలను నిర్వర్తిస్తూనే తల్లిగా తన బాధ్యతను కూడా సమర్థంగా నిర్వహించారు. సమావేశానికి సంబంధించిన ఫొటోలు, వీడియోలు సోషల్ మీడియాలో వైరల్ అవుతున్నాయి.
ఈ సందర్భంగా రొమినా మాట్లాడుతూ.. "కెరీర్ కోసం కుటుంబాన్ని, కుటుంబం కోసం కెరీర్ను వదులుకోవాల్సిన అవసరం లేదు. వృత్తి, కుటుంబం మధ్య ఒకటి మాత్రమే ఎంచుకోవాల్సిన పరిస్థితి ఉండకూడదు. రెండింటినీ సమతుల్యం చేసుకోవడం సాధ్యమే అని చెప్పడానికే నా కుమారుడిని సమావేశానికి తీసుకొచ్చాను" అని అన్నారు. అలాగే ఇలాంటి నిర్ణయాలు తీసుకోవడంలో కుటుంబ సభ్యుల మద్దతు ఎంతో కీలకమని, ముఖ్యంగా తన భర్త అందించిన సహకారం వల్లే ఇది సాధ్యమైందని పేర్కొన్నారు.
రొమినా పౌర్మొఖ్తారీ స్వీడన్ రాజకీయాల్లో యువ నాయకత్వానికి ప్రతీకగా నిలిచారు. 2022లో కేవలం 26 ఏళ్ల వయసులో స్వీడన్ చరిత్రలోనే అత్యంత పిన్న వయస్కురాలైన మంత్రిగా ఆమె బాధ్యతలు స్వీకరించారు. వలస నేపథ్యం ఉన్న కుటుంబం నుంచి రాజకీయాల్లోకి వచ్చిన ఆమె పర్యావరణ పరిరక్షణ, వాతావరణ మార్పులు, సుస్థిర అభివృద్ధి వంటి అంశాలపై చురుకుగా పనిచేస్తూ ప్రత్యేక గుర్తింపు సంపాదించారు.
రొమినా నిర్ణయం సోషల్ మీడియాలో విస్తృత చర్చకు దారితీసింది. "ఇదే నిజమైన వర్క్-లైఫ్ బ్యాలెన్స్", "తల్లితనాన్ని గౌరవించే సమాజానికి ఇది గొప్ప ఉదాహరణ", "మహిళలు కెరీర్ను కొనసాగించడానికి ఇలాంటి కార్యాలయ సంస్కృతి అవసరం" అంటూ వేలాది మంది నెటిజన్లు ఆమెను అభినందిస్తున్నారు. మరికొందరు అధికారిక సమావేశాలకు చిన్నారులను తీసుకురావడం సరైందా అనే అంశంపై కూడా అభిప్రాయాలు వ్యక్తం చేసినప్పటికీ, ఎక్కువ మంది ఆమె నిర్ణయాన్ని సానుకూలంగా స్వాగతించారు.
Click it and Unblock the Notifications
Sign in with Google