బుల్లెట్ ప్రూఫ్ జాకెట్ ను పరీక్షంచబోయి.. ప్రాణాలే కోల్పోయాడు, ఎందుకలా?

ఫ్లోరిడా: బుల్లెట్ ప్రూఫ్ జాకెట్ ను పరీక్షించాలని ఓ యువకుడు చేసిన ప్రయత్నం కాస్త బెడిసికొట్టింది. బుల్లెట్లు శరీరంలోకి దూసుకెళ్లడంతో ఆ యువకుడు ప్రాణాలు కోల్పోయాడు. గత ఆదివారం నాడు ఫ్లోరిడాలోని టంపాలో ఈ దుర్ఘటన చోటు చేసుకుంది.

టంపాలో నివాసముండే జోక్విన్ మెండాజ్ అనే యువకుడు (23) ఓ పాత బుల్లెట్ ప్రూఫ్ జాకెట్‌ను పరీక్షించాలనుకున్నాడు. ఇందుకోసం ఆ బుల్లెట్ ప్రూఫ్ జాకెట్ ను ధరించి, అతడి కజిన్ అలెగ్జాండ్రియో గరిబాల్డి(24)ని తుపాకీతో షూట్ చేయాల్సిందిగా కోరాడు.

తుపాకితో తన గుండెపై కాల్చాలని మెండాజ్ కోరడంతో.. గురి చూసి మెండాజ్ గుండెపై కాల్చాడు అలెగ్జాండ్రియా. అంతే మెండాజ్ గుండెలోకి బుల్లెట్ చొచ్చుకెళ్లడంతో ఒక్కసారిగా కుప్పకూలిపోయాడు. అనంతరం సమాచారం అందుకున్న పోలీసులు ఘటనా స్థలానికి చేరుకుని రక్తపు మడుగులో పడి ఉన్న మెండాజ్‌ను వెంటనే ఆస్పత్రికి తరలించారు.

ఆస్పత్రిలో చికిత్స పొందుతూ మృతి చెందాడు. మెండాజ్ ను అలెగ్జాండ్రియో గన్ తో షూట్ చేస్తున్న సమయంలో ప్రత్యక్ష సాక్షి ఒకరు చూసినట్లు పోలీసులు వెల్లడించారు. అలెగ్జాండ్రియా కూడా నేరం అంగీకరించడంతో.. హత్యానేరం కింద అతనిపై కేసు నమోదు చేసి అదుపులోకి తీసుకున్నారు పోలీసులు.

English summary

A man wanted to see if a bullet-proof vest that he had actually worked, so his cousin shot him in the chest, and wound up killing him, according to Tampa police.