అమెరికాలో ఫైరింగ్: తండ్రిని చంపేసి, పాఠశాలపై కాల్పులు
దక్షిణ కరోలినా: అమెరికా మరోసారి కాల్పులతో దద్దరిల్లింది. ఓ 14ఏళ్ల బాలుడు తన తండ్రిని తుపాకీతో కాల్చి చంపేసి.. ఆ తర్వాత సమీపంలోని స్కూల్లో కాల్పులకు తెగబడ్డాడు. ఈ ఘటనలో స్కూల్లోని ఇద్దరు విద్యార్థులు, ఓ టీచర్ గాయపడ్డారు.
స్థానిక అధికారులు తెలిపిన వివరాల ప్రకారం.. దక్షిణ కరోలినాకు చెందిన 14ఏళ్ల బాలుడు తన తండ్రి జెఫ్రీ డెవిట్ ఓస్బోర్న్(47)ను తుపాకీతో కాల్చి చంపాడు. అనంతరం ఓ ట్రక్ తీసుకుని సమీపంలోని టౌన్విల్లె ఎలిమెంటరీ స్కూల్ మైదానంలోకి దూసుకెళ్లాడు. అక్కడ చిన్నారులపై కాల్పులకు తెగబడ్డారు.
ఈ హఠాత్పరిణామానికి ఆందోళనకు గురైన ఉపాధ్యాయులు వెంటనే చిన్నారులను తీసుకుని పాఠశాల భవనంలోని వెళ్లిపోయారు. ఘటనపై పోలీసులకు సమాచారమందించారు. పోలీసులు పాఠశాలకు చేరుకునేలోపే ఓ అగ్నిమాపక వాలంటీర్ ప్రాణాలకు తెగించి అడ్డువెళ్లి కాల్పులు జరుపుతున్న బాలుడిని పట్టుకున్నాడు.
కాల్పుల్లో గాయపడిన ఓ చిన్నారి పరిస్థితి విషమంగా ఉన్నట్లు అధికారులు తెలిపారు. అయితే, బాలుడు కాల్పులకు ఎందుకు పాల్పడ్డాడన్నది మాత్రం తెలియరాలేదు. పోలీసులు అతడిని అదుపులోకి తీసుకుని విచారిస్తున్నారు.
Click it and Unblock the Notifications
Sign in with Google