షాకింగ్.. అమెరికాలోని ప్లాంట్ లో భారీ పేలుడు..

అగ్రరాజ్యం అమెరికాలోని టెన్నెస్సీ రాష్ట్రంలో ఘోర ప్రమాదం జరిగింది. మిలిటరీ ప్లాంట్ లో భారీ పేలుడు సంభవించింది. ఈ ప్రమాదంలో పలువురు మృతి చెందినట్లు తెలుస్తోంది. పేలుడు ధాటికి పరిసర ప్రాంతాల్లోని ఇళ్లు ధ్వంసం అయ్యాయి. వెంటనే స్పందించిన అధికారులు ఆ ప్రాంతాన్ని ఖాళీ చేయిస్తున్నారు. ప్రజల్ని సురక్షిత ప్రాంతాలకు తరలిస్తున్నారు. పేలుడు జరిగిన ప్లాంట్ నుంచి దట్టమైన పొగ కమ్మేసిన దృశ్యాలు సామాజిక మాధ్యమాల్లో వైరల్ గా మారాయి.

టెన్నెస్సీ రాష్ట్రం, సౌత్ వెస్ట్ ఆఫ్ నాష్ విల్లే, బక్స్ నార్ట్ ప్రాంతంలోని అక్యురేట్ ఎనర్జీ సిస్టమ్స్ ప్లాంట్ వద్ద భారీ పేలుడు సంభవించింది. ఈ ప్రమాదంలో పలువురు మృతి చెందినట్లు సమాచారం అందుతోంది. అయితే ఎంతమంది ప్రాణాలు కోల్పోయారన్న సమాచారం ఇంకా తెలియలేదు. పేలుడు కారణంగా ప్లాంట్ లోని పరిసర ప్రాంతాలు దట్టమైన పొగ అలుముకుంది. ఘటనాస్థలికి చేరుకున్న సహాయక సిబ్బంది.. ప్రజల్ని సురక్షిత ప్రాంతాలకు తరలిస్తున్నారు.

మృతులు, క్షతగాత్రుల సంఖ్య ఇప్పుడే చెప్పలేమని హిక్ మాన్ కౌంటీ కు చెందిన అధికారి డేవిడ్ స్టీవార్ట్ తెలిపారు. ప్లాంట్ నుంచి దట్టమైన పొగ ఆకాశాన్ని తాకుతోందని.. మంటలను అదుపుచేస్తున్నట్లు పేర్కొన్నారు. బ్లాస్టింగ్ జరిగినట్లు స్థానికులు ఇచ్చిన సమాచారం మేరకు ఇక్కడకు చేరుకున్నట్లు.. సహాయక చర్యలను ముమ్మరం చేసినట్లు వివరించారు. ప్రజలు భయబ్రాంతులకు గురికాకుండా ఇళ్లలోనే సురక్షితంగా ఉండాలని సూచనలు చేశారు. ఈ ప్రమాదానికి గల కారణాలను అన్వేషిస్తున్నట్లు డేవిడ్ స్టీవార్ట్ పేర్కొన్నారు. అయితే ఈ ఘటన నేపథ్యంలో స్థానిక అధికారులపై ప్రజలు ఆగ్రహం వ్యక్తం చేశారు.