"వెనిజులాలోని చమురు నిల్వలు అమెరికా ఆధీనంలోకి"

వెనిజులాపై అమెరికా సైన్యం వైమానిక దాడులను చేపట్టిన విషయం తెలిసిందే. వెనిజులా రాజధాని కరాకస్ లోని పలు ప్రాంతాలపై అమెరికాకు చెందిన డెల్టా ఫోర్స్ దాడులకు పాల్పడింది . అనంతరం వెనిజులా అధ్యక్షుడు నికోలస్ మదురో అతన సతీమణి సిలియా ఫ్లోర్స్ ను కస్టడీలోకి తీసుకుని న్యూయార్క్ కు తరలించింది. ఈ క్రమంలో వెనిజులాలో తాత్కాలిక అధ్యక్షురాలిగా డెల్సీ రోడ్రిగిజ్ ను అమెరికా ప్రభుత్వం నియమించింది. అయితే తాజాగా అమెరికా అధ్యక్షుడు ట్రంప్ వెనిజులాలోని చమురు నిల్వల అంశంలో కీలక వ్యాఖ్యలు చేశారు.

వెనిజులా తాత్కాలిక అధ్యక్షురాలు డెల్సీ రోడ్రిగిజ్ కు అమెరికా నుంచి పూర్తి సపోర్ట్ ఉంటుందని అమెరికా అధ్యక్షుడు డొనాల్డ్ ట్రంప్ స్పష్టం చేశారు. అమెరికన్ చమురు సంస్థలు వెనిజులాలో మౌలిక సదుపాయాలను మెరుగుపరుస్తాయని అన్నారు. వెనిజులాలోని చమురు నిల్వల నుంచి వచ్చిన ఆదాయంతో ఆ దేశంలోనే అభివృద్ధికి ఖర్చు చేయనున్నట్లు ట్రంప్ స్పష్టం చేశారు. ఈ మేరకు వెనిజులా తాత్కాలిక ప్రభుత్వంతో కలిసి పనిచేస్తున్నట్లు వివరించారు. చమురు నిల్వల ద్వారా వెనిజులాలో సంపద సృష్టించేందుకు అమెరికా అండదండగా ఉంటుందని ట్రంప్ పేర్కొన్నారు.

అమెరికా అధ్యక్షుడు ట్రంప్.. న్యూయార్క్ టైమ్స్ కు ఇచ్చిన ఇంటర్వ్యూలో వెనిజులాలో చమురు నిల్వల అంశంపై పలు వ్యాఖ్యలు చేశారు. అమెరికాలోని చమురు కంపెనీలు.. వెనిజులాలోని చమురు నిల్వలను ఉపయోగించుకుని.. ఆ దేశంలోనే సంపద సృష్టిస్తాయని స్పష్టం చేశారు. వెనిజులాలో మౌలిక సదుపాయాల ఏర్పాటుకు అమెరికన్ చమురు కంపెనీలు కట్టుబడి ఉన్నాయని తెలిపారు.

వెనిజులాలోని చమురుతో వాణిజ్యం చేసి ఆ డబ్బును అక్కడి ప్రజలకే అందజేస్తామని ట్రంప్ వివరించారు. అంతేకాక చమురు ధరలు తగ్గుముఖం పట్టేలా చర్యలు తీసుకుంటామని అన్నారు. వెనిజులా తన చమురులో దాదాపు 50 మిలియన్ బ్యారెళ్లను అమెరికాకు అందిస్తుందని ట్రంప్ స్పష్టం చేశారు. దాని విలువ అంతర్జాతీయ మార్కెట్ లో సుమారు 2.8 బిలియన్ డాలర్లుగా ఉంది.

ఇక ప్రపంచంలోనే అత్యధిక చమురు నిల్వలు కలిగిన దేశాల్లో వెనిజులా ఒకటి. అసోసియోటెడ్ ప్రెస్ రిపోర్టు ప్రకారం.. వెనిజులాలో 303 బిలియన్ బ్యారెళ్ల ముడి చమురు నిల్వలు ఉన్నాయి. ఇది ప్రపంచంలోని చమురు సరఫరాలో దాదాపు 17 శాతం. అయితే వెనిజులాలో సరైన మౌలిక సదుపాయాలు లేకపోవడంతో ముడి చమురును బయటకు తీయడంలో జాప్యం జరుగుతోంది.దాంతోపాటు దశాబ్దాల కాలంగా వెనిజులాలో కొనసాగుతున్న రాజకీయ అస్థిరత, ఆంక్షలు, సరైన పెట్టుబడులు లేకపోవడం వల్ల ఉత్పత్తి తక్కువగా ఉంది. ఈ క్రమంలోనే వెనిజులా నుంచి సుమారు 50 మిలియన్ బ్యారెళ్ల చమురును వెలికితీసి అంతర్జాతీయ మార్కెట్లో విక్రయించాలని అమెరికా ప్రణాళికలు రచిస్తోంది.