UAE: చమురు కూటమికి యూఏఈ గుడ్ బై..! అంతర్జాతీయంగా ప్రకంపనలు..!
అంతర్జాతీయ ఇంధన రంగంలో కీలక పరిణామం చోటు చేసుకుంది. యునైటెడ్ అరబ్ ఎమిరేట్స్ (UAE) ఆర్గనైజేషన్ ఆఫ్ ది పెట్రోలియం ఎక్స్పోర్టింగ్ కంట్రీస్ (OPEC), విస్తృత OPEC+ కూటమి నుండి లాంఛనంగా వైదొలుగుతున్నట్లు ప్రకటించింది. మే 1 నుంచి ఈ నిర్ణయం అమల్లోకి వస్తుందని ప్రకటించింది. దీంతో దాదాపు ఆరు దశాబ్దాల సభ్యత్వానికి యూఏఈ ముగింపు పలికినట్లయింది. ఇది ప్రపంచ చమురు ధరలను నియంత్రించే ఒపెక్ సామర్థ్యంపై ప్రభావం చూపనుంది.
రాష్ట్ర వార్తా సంస్థ WAM ద్వారా, యూఏఈ ఇంధన మంత్రిత్వ శాఖ, తమ ఉత్పత్తి విధానంపై "సమగ్ర సమీక్ష" తర్వాత ఈ నిర్ణయం ప్రకటించింది. 2027 నాటికి రోజుకు 5 మిలియన్ బారెల్స్ (bpd) ఉత్పత్తి చేయాలనే అబుదాబి ఉత్పత్తి లక్ష్యాలను, OPEC+ కూటమి విధించిన కఠినమైన కోటాలు అడ్డుకుంటున్నాయని యూఏఈ ఆరోపించింది. ఒపెక్ కూటమి నుంచి వైదొలగడం ద్వారా, యూఏఈ సొంత చమురు ఉత్పత్తి స్థాయిలను నిర్ణయించుకునే సార్వభౌమాధికారాన్ని తిరిగి పొందుతుంది.
జాతీయ ప్రయోజనం, ప్రపంచ మార్కెట్ అవసరాలను సమర్థవంతంగా తీర్చడమే ఈ నిర్ణయానికి కారణం. నిల్వలను దూకుడుగా వినియోగించుకుని, ఆర్థిక వ్యవస్థను వైవిధ్యపరచడానికి నిధులు సమకూర్చడమే యూఏఈ లక్ష్యం. ప్రాంతీయ అస్థిరత, ఇరాన్తో కొనసాగుతున్న వివాదం ఇంధన మార్కెట్లను కలచివేస్తున్న తరుణంలో యూఏఈ నిష్క్రమణ కీలకంగా మారింది. ఓపెక్ బాస్ సౌదీ అరేబియాతో యూఏఈకి పెరుగుతున్న ఘర్షణే ఈ నిర్ణయం వెనుక కారణంగా తెలుస్తోంది. హార్ముజ్ జలసంధిలో సముద్ర రవాణాపై దాడుల వంటి బెదిరింపులకు ఇతర అరబ్ దేశాల నుండి తగిన రక్షణ లేదని యూఏఈ భావన.
యూఏఈ నిర్ణయం అమెరికా అధ్యక్షుడు డొనాల్డ్ ట్రంప్కు దౌత్యపరమైన విజయంగా భావిస్తున్నారు. ట్రంప్ ఒపెక్ ను అంతర్జాతీయ చమురు ధరలను పెంచుతుందని తరచుగా విమర్శిస్తూ వస్తున్నారు. యూఏఈ ఈ చర్య ద్వారా పశ్చిమ దేశాల్లోని తన ప్రధాన భద్రతా మిత్రులతో ఇంధన విధానాన్ని సమలేఖనం చేసుకుంటుంది; రియాద్, మాస్కో మద్దతు ఇచ్చే నియంత్రిత స్థిరత్వం కంటే, మార్కెట్ ఆధారిత ధరలకే ప్రాధాన్యత ఇస్తుంది. గణనీయమైన అదనపు సామర్థ్యం గల ఒపెక్ సభ్యుల్లో యూఏఈ ఒకటి. దాని నిష్క్రమణ కూటమి సమిష్టి బేరసారాల శక్తిని బలహీనపరుస్తుంది. ఈ నష్టం డొమినో ప్రభావాన్ని లేదా ధరల యుద్ధాన్ని ప్రేరేపించవచ్చని విశ్లేషకులు హెచ్చరిస్తున్నారు. మార్కెట్ వాటాను నిలబెట్టుకోవడానికి ఇతర సభ్యులు కోటాలు ఉల్లంఘించవచ్చని, అదే సమయంలో ఒపెక్ ప్లస్ కూటమి కొత్త సవాళ్లను ఎదుర్కోక తప్పేలా లేదు.
Click it and Unblock the Notifications
Sign in with Google