మైనర్ బాలికపై క్యాబ్ డ్రైవర్ రేప్?: నిర్మానుష్య ప్రాంతానికి తీసుకెళ్లి..

బ్రిస్బేన్‌కు చెందిన ఓ మైనర్ బాలిక(16)పై ఉబర్ క్యాబ్ డ్రైవర్ అత్యాచారానికి పాల్పడ్డాడు.

బ్రిస్బేన్: ఓ మైనర్ బాలికపై అత్యాచారానికి పాల్పడ్డ క్యాబ్ డ్రైవర్ ను ఆస్ట్రేలియా పోలీసులు అరెస్టు చేశారు. గడిచిన వారంలో ఇలాంటి ఘటన చోటు చేసుకోవడం ఇది రెండవదని తెలిపారు. తాజా ఘటనలో క్యాబ్ డ్రైవర్ బాలికను నిర్మానుష్య ప్రాంతానికి తీసుకెళ్లి ఆమెపై అత్యాచారానికి పాల్పడినట్లు చెప్పారు.

వివరాల్లోకి వెళ్తే.. జులై 8న బ్రిస్బేన్‌కు చెందిన ఓ బాలిక(16) నగరంలోని ఒక ప్రాంతానికి వెళ్లడానికి ఉబర్ క్యాబ్ బుక్ చేసుకుంది. క్యాబ్ లో ప్రయాణిస్తున్న క్రమంలో డ్రైవర్ కన్ను ఆమెపై పడింది. మార్గమధ్యలోనే ఆమెను లైంగికంగా వేధించిన అతను.. క్యాబ్ ను దారి మళ్లించాడు. ఓ నిర్మానుష్య ప్రాంతానికి తీసుకెళ్లి ఆమెపై అత్యాచారానికి పాల్పడ్డాడు.

బాధిత బాలిక విషయాన్ని తన తల్లిదండ్రులకు చెప్పడంతో.. వారు పోలీసులకు ఫిర్యాదు చేశారు. దీంతో క్వీన్స్ ల్యాండ్ పోలీసులు అతన్ని అదుపులోకి తీసుకున్నారు. పోలీసుల సమాచారం మేరకు ఉబర్ సంస్థ.. అతని లైసెన్స్ రద్దు చేసింది. అరెస్టు అనంతరం అతన్ని బ్రిస్బేన్ మెజిస్ట్రేట్ కోర్టులో ప్రవేశపెట్టగా.. తదుపరి విచారణ వరకు అతన్ని కస్టడీలోకి తీసుకోవాలని కోర్టు సూచించింది.

English summary

An Uber driver has been charged with raping a 16-year-old passenger in the eastern Australian city of Brisbane. He’s the second driver from the ride-hailing service to be charged with sexually assaulting a passenger in the city in a week.