ఉప ప్రధాని రాజీనామా: రిషి సునక్ సర్కార్‌ పతనం?

Published: Friday, April 21, 2023, 15:20 [IST]

లండన్: బ్రిటన్ ప్రభుత్వం మరోసారి సంక్షోభంలో పడినట్టే కనిపిస్తోంది. ఒకదాని తరువాత ఒకటి అనూహ్య పరిణామాలు సంభవిస్తోన్నాయక్కడ. ప్రధాన మంత్రి రిషి సునక్ (Rishi Sunak) తక్షణ నివారణ చర్యలు తీసుకున్నప్పటికీ- పెద్దగా ఫలితాలనివ్వట్లేదు. ఇదివరకు బోరిస్ జాన్సన్ ప్రభుత్వంలో తలెత్తిన పరిస్థితులే ఇప్పుడూ అక్కడ నెలకొంటోన్నాయి. పెద్ద తలకాయల రాజీనామాలకు దారి తీస్తోన్నాయి.

రిషి సునాక్ ప్రభుత్వంలో ఉప ప్రధానమంత్రిగా పని చేస్తోన్న డొమినిక్ రాబ్ (Dominic Raab) తాజాగా తన పదవికి రాజీనామా చేశారు. న్యాయ మంత్రిత్వ శాఖను ఆయనే పర్యవేక్షిస్తోన్నారు. బెదిరింపులకు సంబంధించి ఆయనపై అధికారికంగా ఫిర్యాదులు అందిన నేపథ్యంలో రిషి సునక్ ప్రభుత్వం ఆయనపై దర్యాప్తునకు ఆదేశించింది. డామినిక్ రాబ్‌పై వచ్చిన ఫిర్యాదులపై దర్యాప్తు సాగించడానికి ఆడమ్ టాల్లీ కేసీ ఆధ్వర్యంలో స్వతంత్ర సంస్థను ఏర్పాటు చేసింది.

తనపై వచ్చిన ఫిర్యాదులపై విచారణకు ఆదేశించడం పట్ల డొమినిక్ రాబ్ అభ్యంతరం వ్యక్తం చేశారు. తన పదవికి రాజీనామా చేస్తోన్నట్లు ప్రకటించారు. రాజీనామా లేఖను ప్రధానమంత్రి రిషి సునక్‌కు పంపించారు. ఇదే లేఖ ప్రతులను తన అధికారిక మైక్రో బ్లాగింగ్ ప్లాట్‌ఫామ్ ట్విట్టర్‌పైనా పోస్ట్ చేశారు. రెండు పేజీలు ఉన్న రాజీనామా లేఖ ఇది. నా రాజీనామా ప్రకటన.. అంటూ సింగిల్ లైన్ ట్యాగ్ దీనికి జోడించారు.

తనపై వచ్చిన ఫిర్యాదులపై విచారణ జరిపించాలంటూ తానే ఇదివరకు డిమాండ్ చేశానని డొమినిక్ రాబ్ గుర్తు చేశారు. ఇందులో ఏదైనా బెదిరింపు ఉన్నట్లు తేలితే పదవికి రాజీనామా చేస్తాన ప్రకటించారు. దీనికి అనుగుణంగా ఆయన యూకే ఉప ప్రధానమంత్రి పదవికి గుడ్‌బై చెప్పారు. ఈ విషయంలో తన మాటను నిలబెట్టుకోవడం ముఖ్యమని నమ్ముతున్నానని అన్నారు డొమినిక్ రాబ్.

తనపై వచ్చిన బెదిరింపులపై విచారణ జరిపించాలంటూ రిషి సునాక్ నిర్ణయం తీసుకోవడాన్ని తప్పు పట్టారు. ఇదొక ప్రమాదకరమైన సంప్రదాయానికి కేంద్రబిందువు అయిందని వ్యాఖ్యానించారు. ఈ సంప్రదాయం- మంత్రులపై నకిలీ ఫిర్యాదులను ప్రోత్సహిస్తుందని, వారి రాజీనామాలకు కారణమౌతుందని అన్నారు. బ్రిటీష్ ప్రజల తరపున వారిని సరికొత్త మార్పు వైపు నడిపించే వారిపై తీవ్ర ప్రభావం చూపుతుందని ఆవేదన వ్యక్తం చేశారు.

Published On April 21, 2023