ఎప్‌స్టీన్ ఫైల్స్ ప్రకంపనలు: బ్రిటన్ పీఠంపై తొలి ముస్లిం మహిళ?

ప్రస్తుతం బ్రిటన్ రాజకీయాలు అత్యంక క్లిష్టమైన దశలో ఉన్నాయి. ఎప్‌స్టీన్ ఫైల్స్ ప్రకంపనలు ప్రస్తుత ప్రధాని కీర్ స్టార్మర్ కుర్చీని వణికిస్తున్నాయి. ఈ రాజకీయ అస్థిరత మధ్య ఓ పేరు ఇప్పుడు ప్రపంచవ్యాప్తంగా చర్చనీయాంశమైంది. ఆమె మరెవరో కాదు శబానా మహమూద్. కీర్ స్టార్మర్ ఒక వేళ పదవి నుంచి తప్పుకుంటే బ్రిటన్ తదుపరి ప్రధాని అయ్యే అవకాశాలు ఆమెకే ఎక్కువగా ఉన్నాయని విశ్లేషకులు భావిస్తున్నారు. అదే జరిగితే బ్రిటన్‌కు ఆమె తొలి ముస్లిం మహిళా ప్రధాని అవుతారు.

ఇంతకు ఎవరీ శబానా మహమూద్?
శబానా మెహమూద్ 1980, సెప్టెంబర్ 17న ఇంగ్లాండ్‌లోని బర్మింగ్‌హామ్‌లో జన్మించారు. ఆమె తల్లిదండ్రులు పాక్ ఆక్రమిత కాశ్మీర్ (PoK)లోని మీర్‌పూర్ ప్రాంతం నుండి బ్రిటన్‌కు వలస వచ్చారు.శబానా మహమూద్ ఆక్స్‌ఫర్డ్ యూనివర్శిటీలోని లింకన్ కాలేజ్ నుంచి లా పూర్తి చేశారు. వృత్తిరీత్యా ఆమె ఒక బారిస్టర్. 2010లో బర్మింగ్‌హామ్ లేడీవుడ్ సీటు నుంచి ఎంపీగా ఎన్నికయ్యారు. బ్రిటన్ పార్లమెంటుకు ఎన్నికైన తొలి ముస్లిం మహిళా ఎంపీలలో ఆమె ఒకరు. ప్రస్తుతం ఆమె బ్రిటన్ హోమ్ సెక్రటరీగా బాధ్యతలు నిర్వహిస్తున్నారు. గతంలో ఆమె 'లార్డ్ ఛాన్సలర్', న్యాయ శాఖ కార్యదర్శిగా కూడా పనిచేశారు.

భారత్‌కు కఠిన సవాలుగా ఆమె కాశ్మీర్ వైఖరి
శబానా మెహమూద్ ప్రధాని కావడం భారత్-బ్రిటన్ దౌత్య సంబంధాలకు ఒక సవాలుగా మారే అవకాశం ఉంది. ఆమె కాశ్మీరీ మూలాల కారణంగా భారత్ అనుసరిస్తున్న విధానాలపై గతంలో అనేకసార్లు వ్యతిరేకత వ్యక్తం చేశారు. 2019లో భారత్ ఆర్టికల్ 370ని రద్దు చేసినప్పుడు, ఆమె లండన్‌లోని భారత హైకమిషన్ ముందు జరిగిన నిరసనల్లో చురుగ్గా పాల్గొన్నారు. దీన్ని ఆమె "కాశ్మీరీలకు జరిగిన ద్రోహం"గా అభివర్ణించారు. కాశ్మీర్‌లో మానవ హక్కుల ఉల్లంఘన జరుగుతోందని బ్రిటన్ పార్లమెంటులో పలుమార్లు గళమెత్తారు. అంతర్జాతీయ సమాజం ఈ విషయంలో జోక్యం చేసుకోవాలని ఆమె డిమాండ్ చేశారు. హోమ్ సెక్రటరీగా ఆమె వలసల విషయంలో కఠిన వైఖరిని అవలంబిస్తున్నారు. వీసా నిబంధనలను కఠినతరం చేయాలని ఆమె వాదిస్తున్నారు, దీనివల్ల బ్రిటన్‌కు వెళ్లే భారతీయ విద్యార్థులు, నిపుణులపై ప్రభావం పడే అవకాశం ఉంది.

స్టార్మర్ సంక్షోభానికి కారణమైన 'ఎప్‌స్టీన్ ఫైల్స్'
ప్రస్తుత ప్రధాని కీర్ స్టార్మర్ కష్టాల్లో పడటానికి కారణం ఆయన సన్నిహితుడు పీటర్ మాండెల్సన్. లైంగిక నేరగాడు జెఫ్రీ ఎప్‌స్టీన్‌తో మాండెల్సన్‌కు సంబంధాలు ఉన్నట్లు బయటపడటంతో బ్రిటన్ ప్రభుత్వం ఆత్మరక్షణలో పడింది. దీనికి బాధ్యత వహిస్తూ స్టార్మర్ చీఫ్ ఆఫ్ స్టాఫ్ మోర్గాన్ మాక్‌స్వీనీ ఫిబ్రవరి 8న రాజీనామా చేశారు. ఈ పరిణామాలన్నీ శబానా మహమూద్‌కు మార్గం సుగమం చేస్తున్నాయి.

భారత్ వైఖరి ఏంటి?
భారత సంతతికి చెందిన రిషి సునక్ హయాంలో భారత్-బ్రిటన్ సంబంధాలు కొత్త పుంతలు తొక్కాయి. కానీ శబానా మహమూద్ ప్రధాని అయితే పరిస్థితి కొంత అసౌకర్యంగా మారవచ్చు. అయితే, ఒక వ్యక్తిగత అభిప్రాయాల కంటే 'జాతీయ ప్రయోజనాలే' ముఖ్యం కాబట్టి, ప్రధాని అయ్యాక ఆమె తన వైఖరిని మార్చుకునే అవకాశం ఉందని దౌత్య నిపుణులు అంచనా వేస్తున్నారు.

English summary

UK Political Crisis, British PM Keir Starmer faces leadership crisis over the Epstein files and Mandelson scandal. Home Secretary Shabana Mahmood emerges as a top contender to lead the UK government.