యోగా చేస్తూ..పట్టు తప్పి..80 అడుగుల ఎత్తు నుంచి కిందికి జారి!

మెక్సికో సిటీ: ప్రమాదకరమైన యోగాసనాన్ని వేయబోయిన ఓ యువతి తన ప్రాణాల మీదికి తెచ్చుకుంది. 80 అడుగుల ఎత్తు నుంచి కిందపడింది. ప్రాణాపాయం నుంచి తప్పించుకున్నప్పటికీ.. తీవ్ర గాయాలపాలైంది. ఆమె శరీరంలో కనీసం 110 ఎముకలు విరిగి ఉంటాయని డాక్టర్లు తెలిపారు. ఈ ఘటన మెక్సికోలోని శాన్ పెడ్రోలో చోటు చేసుకుంది. ఆ యువతి పేరు అలెక్సా టెర్రజా. యోగాసనాలు వేయడం అంటే ఆమెకు చాలా ఇష్టం.

యోగాసనాలతో సాహసోపేత విన్యాసాలను చేయడంలో ఆమెకు మంచి పేరు కూడా ఉందని అంటున్నారు స్థానికులు. శాన్ పెడ్రాలోని ఓ అపార్ట్ మెంట్ లో తన స్నేహితురాలితో కలిసి నివసిస్తోన్న అలెక్సా.. యోగాలో సరికొత్త విన్యాసాన్ని ప్రదర్శించబోయారు. అపార్ట్ మెంట్ ఆరో అంతస్తులో ఉన్న తన ఫ్లాట్ బాల్కనీలో రెయిలింగ్ లను పట్టుకుని తలకిందులుగా యోగాసనాలను వేయాలని నిర్ణయించారు.

నిర్ణయం తీసుకున్నదే తడవుగా అలెక్సా దాన్ని ఆచరణలో పెట్టారు. బాల్కనీ రెయిలింగ్ కు ఆవలి వైపు తలకిందులుగా గాల్లో వేలాడుతూ యోగాసనాన్ని వేయబోయారు. కొద్దినిమిషాల పాటు మాత్రమే ఆమె అలా ఉండగలిగారు. వెనక్కి వచ్చే సమయంలో పట్టు తప్పింది. అంతే. సుమారు 80 అడుగుల ఎత్తు నుంచి ధబేల్ మంటూ కిందపడ్డారు. పడ్డ వెంటనే అపస్మారక స్థితిలోకి వెళ్లిపోయారు. ఈ దృశ్యాన్ని ప్రత్యక్షంగా చూసిన ఆమె స్నేహితురాలు.. అనూహ్యంగా సంభవించిన ఈ ఘటనలో బిత్తరపోయారు.

LLEVA AL EXTREMO
PRÁCTICA DEL YOGA
Al practicar un tipo de yoga al extremo, una joven de San Pedro cayó desde el balcón de su depa a 25 metros de altura.
Alexa Terrazas tiene 110 huesos rotos. Le tienen que reconstruir tobillos, rodillas, cara etc. y no caminará en 3 años. pic.twitter.com/0ftoHPcMCa

— JavoRayado (@javierehdz) August 27, 2019

వెంటనే తోటి అపార్ట్ మెంట్ వాసులను అప్రమత్తం చేశారు. కిందికి వెళ్లే చూసేసరికి అలెక్సా చావుబతుకుల మధ్య కొట్టుమిట్టాడటం కనిపించింది. వెంటనే ఆమెను స్థానిక ఆసుపత్రికి తరలించారు. అత్యవసర చికిత్సను అందిస్తున్నారు. అలెక్సా శరీరంలో 110 ఎముకలు విరిగిపోయినట్లు డాక్టర్లు ధృవీకరించారు. ఆమె ప్రాణాలతో బయటపడటం గొప్ప విషయమని వ్యాఖ్యానించారు. మోకాళ్లు, కాళ్లు, చేతులు, తల భాగాలు విపరీతంగా దెబ్బతిన్నట్లు తెలిపారు. కుటుంబ సభ్యులు రక్తదానం కోసం దాతల సహాయాన్ని కోరారు. ఇప్పటి వరకు 100 మంది రక్తదానం చేసేందుకు ముందుకు వచ్చారు.

English summary

A college student in Mexico survived an 80-foot fall from her balcony on Saturday. Alexa Terraza was practicing an extreme yoga pose over the edge of her sixth-floor apartment balcony in San Pedro when she lost her balance and fell, according to the Daily Mail. An image that shows the 23-year-old hanging upside-down while performing the stunt is being widely shared online.