కుప్పంలో భారీ పేలుడు: ఇల్లు ధ్వంసం; దంపతుల పరిస్థితి విషమం!!

చిత్తూరు జిల్లా కుప్పంలో భారీ పేలుడు సంభవించింది. ఈ పేలుడు ధాటికి ఒక్కసారిగా కుప్పం మొత్తం ఉలిక్కిపడింది. పెద్ద పల్లి గంగమాంబ దేవస్థానం సమీపంలో ఉన్న ఒక ఇంట్లో ఒక్కసారిగా నిన్న అర్ధరాత్రి పేలుడు సంభవించడంతో చుట్టు పక్కల ఉన్న జనాలు భయాందోళనకు గురయ్యారు.

ఏం జరిగిందా అని బయటకు వచ్చి చూసేసరికి ఓ ఇల్లు పూర్తిగా ధ్వంసమైంది. ఆ ఇంట్లో నివసిస్తున్న దంపతులు తీవ్ర గాయాల పాలై పడి ఉన్నారు.మురుగేష్, ధనలక్ష్మి అనే ఇద్దరు భార్య భర్తలు స్టీల్ సామాన్ల వ్యాపారం చేసుకుంటూ జీవనం సాగిస్తున్నారు. అసలు ఏం జరిగిందో తెలియదు గానీ వారి ఇంటి వద్ద పేలుడు సంభవించడం, వారిద్దరూ తీవ్ర గాయాల పాలు కావడం జరిగింది.

దీంతో స్థానికులు క్షతగాత్రులను వెంటనే ఆసుపత్రికి తరలించి చికిత్స అందిస్తున్నారు. ప్రస్తుతం వారి ఇద్దరి పరిస్థితి విషమంగా ఉంది. ఈ ఘటన తెలిసిన వెంటనే పోలీసులు హుటాహుటిన సంఘటన స్థలానికి చేరుకొని కేసు నమోదు చేసుకుని దర్యాప్తు చేస్తున్నారు. దుండగులు పేలుడు పదార్థాలను ఉపయోగించడం వలన ఈ ఘటన జరిగి ఉండొచ్చని పోలీసులు భావిస్తున్నారు.

గుర్తుతెలియని దుండగులు ఆ దంపతులు నివసిస్తున్న ఇంటి గుమ్మం ముందు నాటు బాంబులు, జిలిటెన్ స్టిక్స్ పెట్టి పేల్చినట్టుగా అనుమానాలు వ్యక్తం చేస్తున్నారు. ఈ పేలుడు ధాటికి ఇల్లు పూర్తిగా ధ్వంసమైంది. అయితే వారి ఇంటి ముందు పేలుడు పదార్థాలు పేల్చిన వారు ఎవరు? అసలు వారికి వీరి మధ్య ఉన్న గొడవ ఏమిటి? ఎందుకు వీరిని చంపాలని వారు భావించారు వంటి వివరాలు తెలియాల్సి ఉంది.

దంపతులు టార్గెట్ చేసిన వారే పేలుళ్ళకు పాల్పడ్డారా లేదా ఇంకేదైనా కారణం ఉందా అనే కోణంలో పోలీసులు దర్యాప్తు చేపట్టారు. గాయపడిన దంపతుల పరిస్థితి విషమంగా ఉండటంతో వారు ఈ ఘటనపై మాట్లాడే పరిస్థితి లేదు. కుప్పంలో ఇళ్ల మధ్య భారీ పేలుడు సంభవించడంతో స్థానికంగా ఈ ఘటన తీవ్ర కలకలం రేపింది. ప్రజలలో భయాందోళనలు వ్యక్తమవుతున్నాయి.

English summary

There was a huge explosion in KUPPAM. The house was destroyed by the explosion of locally made bombs and gelatine sticks. The condition of the couple is critical.