భార్యపై కోపం.. నాలుక ఖతం.. ఓ భర్త చేసిన పనికి..!
అమ్రాబాద్ : కుటుంబం అన్నాక గొడవలు, తగాదాలు సహజం. ఇక భార్యాభర్తలంటే అవి కాస్తా ఎక్కువని చెప్పొచ్చు. ఒకే దగ్గర ఇద్దరు కలిసి ఉన్నప్పుడు ఏదో విషయంలో తగవు పడటం సహజం. అయితే వాటిని ఓర్పుతో, సామరస్యంగా పరిష్కరించుకుంటే ఖేల్ ఖతం, దుకాణం బంద్ అనే రీతిలో అవి అక్కడికక్కడే సమసిపోతాయి. అయితే కొందరు చిన్న చిన్న తగాదాలను భూతద్దంలో చూస్తూ లేనిపోని సమస్యలు తెచ్చుకుంటున్నారు. అదే క్రమంలో నాగర్ కర్నూల్ జిల్లాలో జరిగిన ఘటన చర్చానీయాంశంగా మారింది.
నాగర్ కర్నూల్ జిల్లా అమ్రాబాద్ మండలం సార్లపల్లికి చెందిన చిగుర్ల చంద్రయ్య, లింగమ్మ దంపతులు. వీరి కాపురంలో తరచుగా గొడవలు జరుగుతుండేవి. అదే క్రమంలో మంగళవారం నాడు కూడా భార్యతో గొడవపడ్డాడు చంద్రయ్య. ఆ నేపథ్యంలో భార్య తన మాట వినలేదని కోపంతో ఊగిపోయాడు. ఆ రాత్రంతా సరిగా నిద్రపోక లేనిపోని ఆలోచనలతో పిచ్చెక్కిపోయాడు. మరునాడు బుధవారం ఉదయం నిద్ర లేచాక కత్తితో నాలుక కోసుకున్నాడు.
నగ్న చిత్రాలు పంపు.. యువతికి ఫ్రెండ్ బెదిరింపు.. చివరకు..!
అయితే కొడుకు నోటి నుంచి రక్తస్రావం జరుగుతుండటంతో తల్లి ముత్తమ్మ కంగారు పడింది. ఇదేంట్రా అని ఆరా తీయడంతో కోసిన నాలుక భాగాన్ని ఆమె చేతిలో పెట్టడంతో అవాక్కైంది. క్షణం కూడా ఆలస్యం చేయకుండా అచ్చంపేట ఆసుపత్రికి తీసుకెళ్లింది. అయితే అక్కడి వైద్యులు జిల్లా కేంద్రంలోని పెద్దాసుపత్రికి తీసుకెళ్లాలని సూచించడంతో అక్కడకు తీసుకెళ్లింది. అదలావుంటే మెరుగైన వైద్యం కోసం మహబూబ్ నగర్ జిల్లా కేంద్రానికి తీసుకెళ్లాలని డాక్టర్లు చెప్పడంతో చేసేదేమీ లేక అక్కడకు కూడా పట్టుకెళ్లింది. అయితే సినిమా డైలాగు మాదిరి పది నిమిషాల ముందు వస్తే బతికేవారు అనే స్టైల్లో.. కొంచెం ముందు వస్తే నాలుక అతుక్కునేది.. ఇప్పుడేమీ చేయలేమంటూ డాక్టర్లు తేల్చి చెప్పడం గమనార్హం.
క్షణికావేశంలో చంద్రయ్య తీసుకున్న నిర్ణయం ఇప్పుడు ఆయనకు మాటల్లేకుండా చేసింది. భార్యతో గొడవపడిన తరుణంలో ఏ మాత్రం ఆలోచించకుండా కోపంతో రగిలిపోయి నాలుక కోసుకోవడంతో చంద్రయ్యకు మాట్లాడటం ఇకపై కష్టమే మరి.
Click it and Unblock the Notifications
Sign in with Google