అజరుద్దీన్ సినిమా షూటింగ్‌ను అడ్డుకున్న ఓయు విద్యార్థులు

హైదరాబాద్: మాజీ పార్లమెంటు సభ్యుడు, భారత క్రికెట్ జట్టు మాజీ కెప్టెన్ మొహమ్మద్ అజరుద్దీన్ జీవిత కథ ఆధారంగా తెరకెక్కుతున్న సినిమా షూటింగ్‌ను ఉస్మానియా యూనివర్సిటీ విద్యార్థులు అడ్డుకున్నారు. ఈ షూటింగ్ కోసం దరువు, తెలంగాణ ఉద్యమ చైతన్య వేదిక సంస్థలు ముందస్తుగా అనుమతి తీసుకుని షూటింగ్‌కు ఏర్పాట్లు చేసుకున్నారు.

హైకోర్టు దృశ్యాలను ఆర్ట్స్ కళాశాలలో చిత్రీకరించేందుకు అవసరమైన సామాగ్రి మొత్తం తరలించారు. ఈ క్రమంలో బాలీవుడ్ నటీనటులు ఇమ్రాన్ హష్మీ, లారా దత్తాలు వచ్చి షూటింగ్ ప్రారంభిస్తుండగా అక్కడికి చేరుకున్న విద్యార్థులు తక్షణమే షూటింగ్‌ను నిలిపివేయాలని డిమాండ్ చేశారు. చిత్రం యూనిట్ వారికి నచ్చజెప్పేందుకు ప్రయత్నించినా ఫలితం లేకపోయింది.

దాంతో షూటింగ్ చేయకుండానే సినిమా యూనిట్ వెనుదిరిగింది. షూటింగ్ నిర్వహించుకునేందుకు తాము అన్ని అనుమతులు తీసుకున్నామని, ఇలా షూటింగ్‌ను అడ్డుకోవడం విద్యార్థులకు తగదని చిత్ర నిర్వాహకులు అన్నారు. షూటింగ్ నిలిచిపోవడంతో తమకు దాదాపు రూ.30 లక్షల వరకు నష్టం వాటిల్లిందని ఆవేదన వ్యక్తం చేశారు.

కొంతమంది విద్యార్థి నాయకులు వచ్చి తాము అడిగినంత సొమ్ములు ముట్టజెప్పితే షూటింగ్ జరగనిస్తామని, లేదంటే అడ్డుకుంటామని బెదిరించారని వారు చెప్పారు. విద్యార్థుల తీరు వల్ల జాతీయస్థాయిలో ఉస్మానియా యూనివర్సిటీ ప్రతిష్ఠ దెబ్బతింటుందని వారన్నారు.

English summary

Azharudddin film shooting has been obstructed by Osmania University students.