iBomma Ravi ఉదంతంలో కొత్త కోణం: మిర్రర్ సైట్లు సైతం..!!

సినిమాల పైరసీ కాపీలను ఆన్ లైన్ లో విడుదల చేసిన వ్యవహారంలో అరెస్ట్ అయిన ఐబొమ్మ రవి అలియాస్ ఇమ్మడి రవికి బిగ్ షాక్ తగిలింది. ఆయన దాఖలు చేసిన బెయిల్ పిటీషన్లను నాంపల్లి కోర్టు కొట్టివేసింది. బెయిల్ ఇస్తే విదేశాలకు పారిపోయే అవకాశం ఉన్నందున న్యాయమూర్తులు ఈ నిర్ణయం తీసుకున్నారు. ఈ విషయంలో హైదరాబాద్ పోలీసుల తరఫు న్యాయవాది వాదనలతో ఏకీభవించారు. దీంతో ఐబొమ్మ రవి ఇప్పట్లో బయటికి రావడం గగనమే అయింది. ఇంకొన్నాళ్ల పాటు ఆయన పోలీసుల విచారణలో కొనసాగనున్నారు.

ప్రస్తుతం ఆయన హైదరాబాద్ పోలీసుల విచారణలో ఉన్నారు. మొత్తం అయిదు కేసుల్లో రవి.. విచారణను ఎదుర్కొంటోన్న విషయం తెలిసిందే. తనకు బెయిల్ మంజూరు చేయాలంటూ ఈ అయిదు కేసుల్లోనూ పిటీషన్లను దాఖలు చేశారు. వాటిని కోర్టు విచారణకు స్వీకరించింది. నేడు విచారణ చేపట్టింది. ఈ సందర్భంగా న్యాయవాదులు తమ వాదనలను వినిపించారు. రవికి విదేశాల్లో పౌరసత్వం ఉందని పోలీసులు కోర్టుకు తెలిపారు.

బెయిల్ ఇస్తే దేశం దాటి పోయే అవకాశం ఉందని పేర్కొన్నారు. వారి వాదనలతో కోర్టు ఏకీభవించింది. అయిదు బెయిల్ పిటీషన్లనూ కొట్టివేసింది. ఇమ్మడి రవి విచారణ సందర్భంగా పలు కీలక విషయాలు వెలుగులోకి వచ్చాయి. ఏడేళ్లుగా అక్రమ బెట్టింగ్ యాప్‌ల ద్వారా సంపాదించిన ఆదాయంతో విదేశాల్లో భారీగా ఆస్తులను కూడబెట్టినట్లు పోలీసులు గుర్తించారు. దీని వివరాల గురించి పోలీసులు ఆరా తీస్తోన్నారు. 25 మంది దేశ, విదేశీ సాంకేతిక నిపుణులతో సినిమాలు పైరసీ చేస్తున్నట్లు అతను అంగీకరించాడు.

ఐబొమ్మ, ఐబొమ్మ వన్ వంటి మిర్రర్ వెబ్‌సైట్ల కోసం ప్రత్యేక సాఫ్ట్‌వేర్ అభివృద్ధి చేశాడు. కరీబియన్ దీవుల్లోని తన నివాసం సమీపంలో 'వార్ హౌస్' నుంచే కార్యకలాపాలు నిర్వహించినట్లు విచారణలో వెల్లడించాడు. తన సహచరులు, టెక్నికల్ టీమ్, ఏజెంట్లు, మేనేజర్ల వివరాలను రాతపూర్వకంగా ఇవ్వాలని పోలీసులు ఆదేశించారు. దర్యాప్తునకు సహకరించకుంటే అదనపు కేసుఅను ఎదుర్కొనాల్సి ఉంటుందనీ హెచ్చరించారు.

ప్రీరిలీజ్ సినిమాల ప్రసారం, దీనికోసం వినియోగించిన సాఫ్ట్‌వేర్, వాటి మూలాల గురించీ ఆరా తీస్తోన్నారు. ఐబొమ్మకు సినిమా సరఫరా చేసిన వారి వివరాలను గుర్తించారు. కోట్ల రూపాయల 'మూవీ రూల్స్' వెబ్‌సైట్ ద్వారా క్రిప్టో కరెన్సీ లావాదేవీలు జరిగాయని, ఐబొమ్మ బెట్టింగ్ యాప్‌లకు గేట్‌వేగా పనిచేసిందని మల్టీ లేయర్డ్ వెబ్‌సైట్‌లలో సినిమాలు ప్రసారం చేస్తూ, వాటిపై బెట్టింగ్ యాప్‌లను పోస్ట్ చేయడం ద్వారా ఈ ఆదాయం సమకూరిందని తెలిపాడు.

English summary

In a major incident, Nampalli Court on Wednesday, January 7, dismissed the Bail petitions filed by the iBomma Ravi, who is in Police custody. ఐబొమ్మ రవికి భారీ షాక్ తగిలింది.