ఆడవేషంలో కారు చోరీ: మామ ఇంటికే కన్నం

హైదరాబాద్: విచిత్రమైన రీతిలో జరిగిన ఓ దొంగతనం వ్యవహారం వెలుగులోకి వచ్చింది. సిసి కెమెరాలకు చిక్కకుండా దొంగలు కొత్త దారులు వెతుక్కుంటున్నారని చెప్పడానికి హైదరాబాదులో జరిగిన ఓ సంఘటన నిదర్శనంగా నిలుస్తుంది.

బంజారాహిల్స్‌లో నివసించే నవీన్‌ కండిల్య ఈ నెల 14న రాత్రి స్కోడాకారులో ఇంటికి వచ్చారు. కారు పార్క్‌ చేయాల్సిందిగా సెక్యూరిటీకి తాళాలిచ్చారు. తర్వాత కాసేపటికే సెక్యూరిటీ గార్డు ఫోన్‌చేసి ఎవరో కారు తీసుకుని పారిపోతున్నారని చెప్పాడు. ఆయన బంజారాహిల్స్‌ పోలీసులకు ఫిర్యాదుచేయగా, వారు సీసీ కెమెరాలో పరిశీలించి, కారు దొంగలించింది ఓ మహిళగా గుర్తించా రు.

అయితే, చోరీ చేసింది కొత్తగా చేరిన వాచ్‌మన్‌ సోనూ అని, సీసీ కెమెరాలో తన ముఖం రికార్డు కాకుండా మహిళ వేషం వేశాడని వెల్లడైంది. అతడి సెల్‌ఫోన్‌ ఆధారంగా బీహార్‌కు వెళ్లిన పోలీసులు కారు నాగ్‌పూర్‌ లో ప్రమాదానికి గురైనట్టు గుర్తించి, దాన్ని స్వాధీనం చేసుకున్నారు.

తిన్న ఇంటి వాసాలు లెక్కించాడో ప్రబుద్ధుడు. మేన మామ వద్ద ఉంటూ ఆయన ఇంటికే కన్నమేసి నగలు దొంగిలించాడు ఓ వ్యక్తి. వాటిని అమ్మే ప్రయత్నంలో మలక్‌పేట పోలీసులకు దొరికాడు.

కాలాడేరా నివాసి షేక్‌ ముస్తాఫాఖాన్‌ (30) ఆటోడ్రైవర్‌. సలీంనగర్‌లోని మేనమామ నూర్‌ ఇంట్లో ఉంటున్నాడు. ఈనెల 11న రాత్రి మేనమామ కుటుంబం ఇంట్లో లేకపోవటంతో తాళాలు పగులగొట్టి 3తులాల బంగారు నగలు, 35తులాల వెండి వస్తువులు చోరీచేసి పారిపోయాడు.

పోలీసులు మంగళవారం తనిఖీ చేస్తుండగా ముస్తఫా ఘనకార్యం వెల్లడైంది. అతన్ని అరెస్టుచేసి సొత్తును స్వాదీనం చేసుకున్నారు.

English summary

A car has been stolen by a man coming in woman outfit in Hyderabad.