వినియోగదారులపై కరెంట్ బిల్లుల పిడుగు: ఇక నెలనెలా అదనపు మోత!

నిత్యావసర ధరల పెరుగుదలతో ఇప్పటికే సతమతమవుతున్న సామాన్య ప్రజలపై మరో ఆర్థిక భారం పడింది. హైదరాబాద్ మహానగరంతో పాటు తెలంగాణ వ్యాప్తంగా ఉన్న గృహ, వాణిజ్య విద్యుత్ వినియోగదారులకు విద్యుత్ పంపిణీ సంస్థలు(డిస్కంలు) ట్రూ-అప్ ఛార్జీల రూపంలో షాకిచ్చాయి. ఈ నెల నుంచి వినియోగదారుల నెలవారీ కరెంట్ బిల్లుల్లో ఈ అదనపు ఛార్జీలను కలిపి వసూలు చేయడం ప్రారంభించాయి.

అసలు ఈ ట్రూ-అప్ ఛార్జీలు ఎందుకు?
డిస్కంలు ప్రతి ఆర్థిక సంవత్సరం ప్రారంభంలో తాము కొనుగోలు చేయబోయే విద్యుత్ ఖర్చులను ముందుగానే అంచనా వేసి ఆ మేరకు టారిఫ్‌లను నిర్ణయిస్తాయి. అయితే డిమాండ్ పెరగడం లేదా బహిరంగ మార్కెట్లో విద్యుత్ ధరలు అధికంగా ఉండటం వంటి కారణాల వల్ల అంచనా వేసిన దానికంటే వాస్తవ కొనుగోలు వ్యయం ఎక్కువగా ఉంటుంది. 2022-23 , 2023-24 ఆర్థిక సంవత్సరాల్లో ఇలా డిస్కంలకు ఏర్పడిన ఆర్థిక లోటును భర్తే చేసుకునేందుకు ఆయా సంవత్సరాల్లో వినియోగదారులు వాడిన కరెంట్ ఆధారంగా ఇప్పుడు ట్రూ-అప్ ఛార్జీలను వసూలు చేస్తున్నాయి. దీనివల్ల సాధారణ గృహ వినియోగదారుల నెలవారీ బిల్లుల్లో రూ.25 నుంచి రూ.50 వరకు అదనంగా భారం పడుతోంది. ఈ వసూళ్ల ప్రక్రియ రెండేళ్లకు పైగా కొనసాగనుంది.

బిల్లుల వసూలు విధానం ఇలా..
రాష్ట్రంలోని రెండు డిస్కంల పరిధిలో వినియోగదారులపై ఈ భారం వేర్వేరు కాలపరిమితుల్లో ఉండనుంది. తెలంగాణ దక్షిణ ప్రాంత విద్యుత్ పంపిణీ సంస్థ పరిధిలోని హైదరాబాద్, ఇతర జిల్లాల వినియోగదారులు మొత్తం 29 నెలల పాటు ఈ అదనపు ఛార్జీలను చెల్లించాల్సి ఉంటుంది. ఇందులో భాగంగా అక్టోబర్ 2027 వరకు 2022-23 ఆర్థిక సంవత్సర సగటు విద్యుత్ వినియోగం ఆధారంగా యూనిట్ కు 30 పైసల చొప్పున వసూలు చేస్తారు. ఆ తర్వాత వచ్చే నెలల్లో 2023-24 వినియోగానికి సంబంధించి ఈ ఛార్జీ యూనిట్‌కు 50 పైసలకు పెరగనుంది. మరోవైపు తెలంగాణ ఉత్తర ప్రాంత విద్యుత్ పంపిణీ సంస్థ పరిధిలోని జిల్లాల వినియోగదారులపై 26 నెలల పాటు ఈ ట్రూ-అప్ ఛార్జీల భారం కొనసాగుతుంది.

రూ.7,635.22 కోట్ల వసూలుకు ఆమోదం
2022-23, 2023-24 ఆర్థిక సంవత్సరాలకు సంబంధించిన ట్రూ-అప్ ఛార్జీల కింద మొత్తం రూ.7,635.22 కోట్లను రాబట్టుకునేందుకు తెలంగాణ రాష్ట్ర విద్యుత్ నియంత్రణ మండలి ఇటీవల డిస్కంలకు అనుమతినిచ్చింది. ఈ మొత్తం బకాయిల్లో వ్యవసాయ రంగానికి అందించిన ఉచిత విద్యుత్ వినియోగానికి సంబంధించి రూ.2.214.99 కోట్ల భారం ఉంది. రైతులపై ఎలాంటి భారం పడకుండా ఈ మొత్తాన్ని రాష్ట్ర ప్రభుత్వమే రాయితీ రూపంలో భరించేందుకు అంగీకరించింది. అయితే మిగిలిన రూ.5420.23 కోట్లను గృహ, వాణిజ్య, పారిశ్రామిక తదితర విద్యుత్ వినియోగదారుల నుంచి నెలవారీ బిల్లుల రూపంలో డిస్కంలు వసూలు చేస్తున్నాయి.

English summary

Telangana DISCOMs have begun collecting True-Up charges for 2022-24 in monthly electricity bills, adding Rs.25 to Rs.50 extra for over two years in Hyderabad.