అద్భుతం: టిఎస్ ఐపాస్‌పై సిఎం కెసిఆర్‌కు ఐటిసి ఛైర్మన్ లేఖ

Published: Wednesday, July 1, 2015, 9:19 [IST]

హైదరాబాద్: రాష్ట్ర ప్రభుత్వం రూపొందించిన నూతన పారిశ్రామిక విధానం(టీఎస్‌ఐపాస్)పై పారిశ్రామిక దిగ్గజం, ఐటిసి ఛైర్మన్ వైసి దేవేశ్వర్ ప్రశంసల వర్షం కురిపించారు. మెదక్‌ జిల్లా మనోహరాబాద్‌లో ఐటిసి సంస్థ స్థాపించ తలపెట్టిన ఆహారశుద్ధి మ్యానుఫాక్చరింగ్, లాజిస్టిక్ పరిశ్రమకు రాష్ట్ర ప్రభుత్వం 12 రోజుల్లోనే అనుమతివ్వటంపై ఆయన ఆశ్చర్యం వ్యక్తంచేశారు.

పారిశ్రామిక విధానం అద్భుతమంటూ ముఖ్యమంత్రి చంద్రశేఖర్ రావుకు లేఖ రాశారు. ఇలాంటి విధానాన్ని ఎక్కడా చూడలేదని, అద్భుత పాలన అందిస్తున్నారని ప్రశంసించారు. సింగిల్ విండో విధానం ద్వారా తమ దరఖాస్తుకు రికార్డు స్థాయిలో 12 రోజుల్లోనే ప్రభుత్వం అనుమతిచ్చిందన్నారు. ఇది నూతన పారిశ్రామిక విధాన శక్తిసామర్థ్యాలకు నిదర్శనమని తెలిపారు.

ఇలాంటి ఉదాహరణలు పెట్టుబడులహిత, గమ్యస్థానంగా తెలంగాణ రాష్ట్ర విశ్వసనీయతను మరింత ఉన్నత స్థానంలోకి తీసుకెళ్తాయని చెప్పారు. ‘ముఖ్యమంత్రి గారూ.. మీ నాయకత్వం అద్భుతంగా ఉంది. ఇది మా ప్రాజెక్టును మరింత వేగంగా చేపట్టేందుకు మాలో స్ఫూర్తిని నింపింది. మీ రాష్ట్ర వినూత్న మార్గం మమ్మల్ని ఎంతగానో ప్రభావితం చేసింది' అని లేఖలో పేర్కొన్నారు.

‘ప్రోత్సాహక ప్యాకేజీ కోసం ఇప్పుడు మేం ఆసక్తిగా ఎదురుచూస్తున్నాం. తెలంగాణ రాష్ట్ర అభివృద్ధిపై మీ ఆశయంలో పాలుపంచుకొంటామని, చిత్తశుద్ధితో కృషిచేస్తామని హామీ ఇస్తున్నాం' అని లేఖలో ఐటిసి ఛైర్మన్ దేవేశ్వర్ స్పష్టం చేశారు.

Published On July 1, 2015