నేనూ అభధ్రతతోనే ఉన్నా: అమీర్ఖాన్ భార్యని మెచ్చుకున్న జైపాల్ రెడ్డి
హైదరాబాద్: బాలీవుడ్ నటుడు అమీర్ ఖాన్కు కాంగ్రెస్ పార్టీ సీనియర్ నేత, మాజీ మంత్రి జైపాల్ రెడ్డి మద్దతుగా నిలిచారు. అమీర్ ఖాన్ ఇటీవల చేసిన వ్యాఖ్యలు దేశవ్యాప్తంగా దుమారం రేపుతున్నాయి. ఆయన పైన ఎక్కువ మంది మండిపడుతున్నారు. విపక్షాలు మాత్రం మద్దతు పలుకుతున్నాయి.
అయితే, సామాన్యుల్లో చాలామంది మాత్రం అమీర్ ఖాన్ వ్యాఖ్యల పైన ఆగ్రహం వ్యక్తం చేస్తున్నారు. కాంగ్రెస్ వంటి విపక్షాలు అమీర్ ఖాన్కు దన్నుగా నిలుస్తున్నాయి. తాజాగా, జైపాల్ రెడ్డి కూడా బాలీవుడ్ హీరోకు అండగా నిలబడ్డారు.
అసహనం పైన తాను చేసిన వ్యాఖ్యల పైన అమీర్ ఖాన్ వివరణ ఇవ్వాల్సిన అవసరం లేదన్నారు. దేశభక్తిని పెంపొందించే ఎన్నో చిత్రాల్లో నటించిన అమీర్ ఖాన్ సముచిత స్థానంలో ఉన్నాడన్నారు. గత కొన్ని మాసాలుగా తానూ అభద్రతాభావంతో ఉన్నానని జైపాల్ రెడ్డి వ్యాఖ్యానించడం గమనార్హం.
పెరుగుతున్న అసహనంపై తన అభిప్రాయాన్ని నిజాయితీగా భర్తకు తెలియజేసిన కిరణ్ రావును జైపాల్ రెడ్డి అభినందించారు. ప్రస్తుతం ఉన్న పరిస్థితుల్లో ఆమె ఇలా అభిప్రాయపడటం సహజమే అన్నారు. ప్రతి ఉదారవాది అమీర్ ఖాన్ భార్య కిరణ్ రావు ధైర్యాన్ని మెచ్చుకోవాల్సిందేనని వ్యాఖ్యానించారు. కిరణ్ రావు భయం చాలామందిలో సహజమే అన్నారు.