కేటీఆర్‌పై ఈడీ ఉచ్చు: భారీగా అరెస్టులు

KTR: తెలంగాణలో సంచలనం సృష్టిస్తోన్న ఫార్ములా ఇ-కార్ రేస్ అవినీతి వ్యవహారం మరో మలుపు తిరిగింది. ఈ కేసులో అరెస్ట్‌ను ఎదుర్కొంటోన్నారు మాజీ మంత్రి, భారత్ రాష్ట్ర సమితి కార్యనిర్వాహక అధ్యక్షుడు కేటీఆర్. ఇప్పటికే ఆయన దాఖలు చేసిన క్వాష్ పిటీషన్‌ను హైకోర్టు కొట్టేయడం, సుప్రీంకోర్టు సైతం దీనిపై విచారణకు నిరాకరించడం ప్రాధాన్యతను సంతరించుకుంది.

తాజాగా- ఈ కేసులో ఎన్‌ఫోర్స్‌మెంట్ డైరెక్టరేట్ దర్యాప్తు మొదలుపెట్టింది. ఈ ఉదయం హైదరాబాద్‌లోని ఈడీ కార్యాలయానికి విచారణకు హాజరయ్యారు కేటీఆర్. విచారణ కొనసాగుతోంది. ఫార్ములా ఇ-కార్ రేస్‌లో అవినీతి నిరోధక శాఖ ఇచ్చిన వివరాలు, ఇతర అంశాలపై విచారణ చేపట్టారు ఈడీ అధికారులు.

ఫార్ములా ఇ- కార్ రేస్ నిర్వాహకులకు ఎవరి అనుమతులు లేకుండా 46 కోట్ల రూపాయలను పౌండ్ల రూపంలో హెచ్ఎండీఏ చెల్లించిందని, ఇది మున్సిపల్ మంత్రిత్వ శాఖ పరిధిలోకి వస్తుందని, ఆ శాఖ మంత్రిగా ఈ చెల్లింపులకు కేటీఆర్ బాధ్యత వహించాల్సి ఉంటుందనేది అధికారుల వాదన.

దీనిపై ఆయన హైకోర్టును ఆశ్రయించినప్పటికీ ఫలితం రాలేదు. క్వాష్ పిటీషన్‌ను హైకోర్టు కొట్టివేసింది. ఆ తరువాత సుప్రీంకోర్టుకు వెళ్లినా ఉపయోగం లేకుండా పోయింది. ఆయన దాఖలు చేసిన పిటీషన్‌ను విచారణకు స్వీకరించడానికి సుప్రీంకోర్టు అంగీకరించలేదు. దీనితో దాన్ని వెనక్కి తీసుకోవాల్సొచ్చిందాయనకు. ఈ పరిణామాల మధ్య ఈడీ విచారణకు కేటీఆర్ హాజరు కావడం చర్చనీయాంశమైంది.

దీన్ని వ్యతిరేకిస్తూ బీఆర్ఎస్ నాయకులు, కార్యకర్తలు, కేటీఆర్ అభిమానులు పెద్ద సంఖ్యలో ఈడీ కార్యాలయానికి చేరుకున్నారు. ఆందోళన చేపట్టారు. అక్కడే బైఠాయించారు. ఈడీ అధికారులు, కేంద్రం- రాష్ట్ర ప్రభుత్వాలకు వ్యతిరేకంగా నినాదాలు చేశారు. జై తెలంగాణ అంటూ నినదించారు. పరిస్థితి అదుపు తప్పుతోండటంతో పోలీసులు వారిని అదుపులోకి తీసుకున్నారు.

English summary

BRS workers who were protesting outside the office of the Enforcement Directorate (ED) in Hyderabad, were detained by police.