ఫిల్మ్ ఇండస్ట్రీలో మళ్ళీ పెళ్ళి హడావిడి.!నరేష్ పవిత్ర యాక్షన్ ఓకే.!క్రిటిక్స్ దే కాస్త ఓవరాక్షన్.!

Published: Friday, May 12, 2023, 18:41 [IST]

హైదరాబాద్ : నటుడు నరేష్ మూడు సార్లు పెళ్లి చేసుకుంటే లేని రచ్చ నాల్గవ సారి మాత్రం వివాదమవుతోంది. వాస్తవాలను ఆవిష్కరించిన మళ్లీ పెళ్లి చిత్రంలో నరేష్, పవిత్రల అంశంలో సినిమా క్రిటిక్స్ విమర్శలకు కాస్త ఎక్కువగానే పదునుపెట్టినట్టు తెలుస్తోంది. నరేష్ నాల్గో పెళ్లి చేసుకున్నాడని నచ్చలేదా లేక పవిత్ర రెండో పెళ్లి చేసుకుందని నచ్చట్లేదా అర్ధం కాని పరిస్ధితి. ఇండస్ట్రీలో పెళ్లి చేసుకోకుండానే కలిసి సహా జీవనం సర్వ సాధారణం కాదా? మరి చట్టబద్దంగా చేసుకుంటే దాన్ని ఇంత విమర్శించడం వెనకున్న మర్మం ఏమిటో ప్రస్తుతం వేలెత్తి చూపుతున్న వారు చెప్పాలి.

సినిమాను సినిమాలాగే చూస్తే ఏ ఇబ్బంది ఉండదు : ఆడవారి డైనమిక్ నిర్ణయాల వలన పితృస్వామ్య వ్యవస్థ లో భూకంపం సంభవించిందని అర్థం చేసుకోవాలి. ఆడవారి జీవితంలో భర్తతో విభేదఇంచి విడాకులు తీసుకుంటే సమాజం వ్యవహరించే తీరు మగవాడు భార్యను విడిచి పెట్టినప్పుడు వ్యవహరించే తీరులో ఉన్న తేడాను కూడా గుర్తించి విశదీకరిస్తే ఆమోదయోగ్యంగా ఉంటుంది. భార్యాభర్తల మధ్య రిలేషన్ ఉండాల లేదా అనేది మగవాడి నిర్ణయించాలి తప్ప ఆడవాళ్ళు కోరుకుంటే విడాకులు మంజూరు కావు అని అందరికీ తెలిసిన విషయమే.

సినిమాకు వ్యక్తిగత కోణం ఆపాదించడం భావ్యమా : విచ్చలవిడి జీవితానికి అలవాటు పడ్డ ఓ మగాడు తన భార్యను సుఖపెట్టడు, అలా అని విడిచిపెట్టడు. కానీ సమాజం కూడా ఆడదాని రాత అంతేలే, అలా బ్రతికేయాలని సలహా ఇస్తుంది. వాడి కోసం కాకపోతే పిల్లల కోసం బ్రతకాలని, తన మనసు ఓ నచ్చిన తోడు కావాలి, ఆ విధంగా ముందడుగు వెయ్యి అని మాత్రం ఈ సమాజం గానీ, కుటుంబ సభ్యులు గానీ ఎట్టి పరిస్ధితిలో చెప్పరు. పెళ్లికి "మనసు" ప్రధానం అనుకుంటే విడాకులు కావు. పెళ్లికి "మనసు" తప్ప అన్ని - డబ్బు, హోదా,...ప్రధానం అనుకుంటే విడాకులు కాక ఏమౌతుంది?ఆలోచించాలి.

నరేష్ కి జీవితంలో చివరగా సోల్ మేట్ కనెక్ట్ అయ్యింది : నరేష్ కి జీవితంలో చివరగా సోల్ మేట్ కనెక్ట్ అయ్యి స్థిరపడతాడేమో అనే సానుకూల కోణంలో ఎందుకు ఆలోచించకూడదు. వివాహం మూడు సార్లు తప్పు అనిపించనప్పుడు నాల్గో సారి తప్పు ఎలా అవుతుంది? ప్రముఖ నటుడు జెమిని గణేష్, గాయకుడు కిషోర్ కుమార్, కమల్ హాసన్, ఇలా కొన్ని దశాబ్దాల క్రితమే సమాజాన్నిఆశ్చర్య పరిచే రీతిలో కట్టుబాట్లను అదిగమించారు కాదు సవరించారు.

నరేష్ పవిత్ర ప్రేమను తప్పుబట్టడం అనవసరం : క్షణకాలం కలిసి ఉండలేని కాపురాన్ని సమాజం కోసం అంత బాగానే ఉన్నట్టు మనసును మోసం చేసుకుంటూ జీవిత కాలం నటిస్తూ జీవించడం కన్నా కాస్త ధైర్యం చేసి ప్రేమను పంచే మనసుతో జీవితాన్ని పునఃప్రారంభించటం చాలా ఉత్తమమైనదనే కోణాన్ని ఆహ్వానించాల్సిన గట్స్ కూడా ఉండాలి మరి. ఈ కోణంలో మళ్లీ పెళ్లి సినిమాని ఆస్వాదిస్తే అందరికి ఆమోదయోగ్యంగా ఉంటుంది.

Published On May 12, 2023