తెలంగాణలో రూ.80 వేల కోట్ల పెట్టుబడులకు ఎన్టీపీసీ గ్రీన్ సిగ్నల్ !

తెలంగాణ రాష్ట్రానికి ఎనర్జీ రంగంలో మరో గుడ్ న్యూస్‌ అందింది. దేశంలోనే అగ్రగామి విద్యుత్ ఉత్పత్తి సంస్థ నేషనల్ థర్మల్ పవర్ కార్పొరేషన్‌ (NTPC) రాష్ట్రంలో భారీ పెట్టుబడులకు సిద్ధమైంది. సంస్థ చైర్మన్‌ & మేనేజింగ్ డైరెక్టర్ గురుదీప్ సింగ్ నేతృత్వంలోని ప్రతినిధుల బృందం, ముఖ్యమంత్రి రేవంత్ రెడ్డిని జూబ్లీహిల్స్‌లోని ఆయన నివాసంలో కలిసింది. ఈ సందర్భంగా రాష్ట్రంలో భవిష్యత్ ప్రణాళికలను, పెట్టుబడుల వివరాలను సీఎం ముందు వివరించారు.

రూ.80,000 కోట్ల పెట్టుబడి..

కాగా రాష్ట్రంలో సౌర, పవన విద్యుత్ ప్రాజెక్టులపై దాదాపు రూ.80,000 కోట్ల పెట్టుబడి పెట్టేందుకు ఎన్టీపీసీ గ్రీన్ సిగ్నల్ ఇచ్చింది. ముఖ్యంగా ఫ్లోటింగ్ సోలార్ ప్రాజెక్టులు ద్వారా సుమారు 6,700 మెగావాట్ల విద్యుత్ ఉత్పత్తికి ప్లాన్ చేస్తున్నారు. ఫ్లోటింగ్ సోలార్ టెక్నాలజీ ద్వారా భూమి వినియోగం లేకుండా విద్యుత్ ఉత్పత్తి చేయవచ్చని స్పష్టం చేస్తున్నారు.

దీని ద్వారా పర్యావరణ పరిరక్షణ, నీటి ఆవిరి తగ్గింపు, స్థానిక యువతకు ఉపాధి అవకాశాలు లభిస్తాయని చెబుతున్నారు. పెద్ద రిజర్వాయర్లు, జలాశయాలు ఈ ప్రాజెక్టులకు అనువైన వనరులని, వాటి వినియోగం ద్వారా రాష్ట్ర శక్తి ఉత్పత్తి సామర్థ్యం గణనీయంగా పెరుగుతుందని నిపుణులు అభిప్రాయపడ్డారు.

ప్రస్తుతం తెలంగాణలో విద్యుత్ అవసరాల ఎక్కువ భాగం థర్మల్, జల విద్యుత్ ఉత్పత్తి ద్వారా తీరుతోంది. పునరుత్పాదక ఇంధన ప్రాజెక్టుల రూపంలో ఈ పెట్టుబడులు రాష్ట్రానికి కీలక మలుపు అవుతాయని సీఎం రేవంత్ రెడ్డి ఆశాభావం వ్యక్తం చేశారు. ఎన్టీపీసీ ప్రతిపాదనకు రాష్ట్ర ప్రభుత్వం అన్ని విధాలా సహకరిస్తుందని, అవసరమైన అనుమతులు, వనరులు, మరియు మౌలిక సదుపాయాలు అందించడంలో ఎటువంటి వెనుకంజ ఉండదని సీఎం హామీ ఇచ్చారు.

English summary

Telangana has received another piece of good news in the energy sector. The country's leading power generation company, National Thermal Power Corporation (NTPC), is set to make huge investments in the state.