కేసీఆర్! చేతులు జోడించి వేడుకుంటున్నా, మమ్మల్ని వదిలేయండి, ఇక చాలు: పవన్ కళ్యాణ్

Published: Thursday, March 14, 2019, 22:13 [IST]

కేసీఆర్‌కు చేతులు జోడించి వేడుకుంటున్నా

రాష్ట్రం విడిపోయాక కొందరు దొడ్డిదారిన ఏపీకి వచ్చారని, విభజన నేపథ్యంలో మేం ఆల్ రెడీ (ఏపీ) దెబ్బతిన్నామని, ఇప్పుడిప్పుడే కోలుకుంటున్నామని, మళ్లీ ఇంకోసారి తమను ఇబ్బంది పెట్టవద్దని తెలంగాణ ముఖ్యమంత్రి కల్వకుంట్ల చంద్రశేఖర రావుకు చేతులు జోడించి వేడుకుంటున్నానని పవన్ కళ్యాణ్ అన్నారు. తాను ఈ రాజమండ్రి వేదికగా కేసీఆర్‌కు ఈ విజ్ఞప్తి చేస్తున్నానని చెప్పారు.

మీరు మళ్లీ వస్తే పాతరోజులు పునరావృతం

దయచేసి అందరం బాగుందామని, మీరు అద్భుతమైన నాయకులు అని కేసీఆర్‌ను ఉద్దేశించి పవన్ కళ్యాణ్ అన్నారు. ఇంకోసారి మమ్మల్ని (ఏపీ ప్రజలను) ఇబ్బంది పెట్టవద్దన్నారు. ఇక్కడ ఏదో చిన్నపాటి గొడవలు ఉంటాయని, అడ్జస్ట్ చేసుకొని వెళ్దామన్నారు. జగన్ మీకు బాగా అర్థమయ్యే వ్యక్తి అని, చంద్రబాబు వద్ద మీరు పని చేశారని, కాబట్టి సామరస్యంగా వెళ్దామని కేసీఆర్‌కు సూచించారు. దయచేసి మళ్లీ మీరు ఇలా వచ్చి గొడవలు పెంచితే పాతరోజులు పునరావృతం అవుతాయన్నారు. ఏపీ రాజకీయాల్లో వేలు పెడతానని చెప్పిన కేసీఆర్ వ్యాఖ్యలను ఉద్దేశించి ఇలా చెప్పారు.

దయచేసి వదిలేయండి

మేం (ఏపీ ప్రజలు) అలసిపోయామని, దశాబ్దం పాటు మీ చేతిలో తిట్లు తిన్నామని, ఒక్కసారి రెండు చేతులు జోడించి కేసీఆర్‌కు నమస్కరిస్తున్నానని, దయచేసి ఆంధ్రుల్ని వదిలేయాలని మనస్ఫూర్తిగా కోరుకుంటున్నానని పవన్ చెప్పారు. అందరం కలిసి ఉండేవాళ్లమని, ఒకే దేశంలో ఉండేవాళ్ళమని, మీరు పాకిస్తానీలు కాదు, మేమే భారతీయులం కాదని, అందరం తెలుగోళ్లం, భారతీయులం అన్నారు. వ్యక్తిగత కక్షలతో ప్రజల మధ్య గొడవలు పెట్టవద్దన్నారు. రాజ్యాల మధ్య విరోధం ఉంటుందని, కానీ ప్రజల మధ్య ఉండదని, కానీ మీరు ప్రజల మధ్య విరోధం పెంచుతానని చెబితే ఎలా, ఎంతసేపు విషపూరితపు మాటలు మాట్లాడుతా అంటే ఎలా అన్నారు. జగన్, కేసీఆర్, చంద్రబాబులకు ఒక్కటే చెబుతున్నానని, మీ గొడవలకు తెలుగు రాష్ట్రాలను బలి చేయవద్దన్నారు. చిన్నపాటి గొడవలు ఉంటే సర్దుకుపోదామన్నారు.

Published On March 14, 2019