ఎవరూ చేయనంత గొప్పగా నటన: శ్రీదేవి మృతిపై సీఎం కేసీఆర్, కృష్ణంరాజు

Published: Sunday, February 25, 2018, 10:59 [IST]

హైదరాబాద్/న్యూఢిల్లీ: సినీ నటి శ్రీదేవి హఠాన్మరణంపై తెలంగాణ రాష్ట్ర ముఖ్యమంత్రి కల్వకుంట్ల చంద్రశేఖర రావు తీవ్ర దిగ్భ్రాంతి వ్యక్తం చేశారు. శ్రీదేవి మరణం భారతీయ సినీ పరిశ్రమకు తీరని లోటు అన్నారు.

ఆమె మరణం తెలుగు సినిమా అభిమానులకు కూడా లోటు మిగిల్చిందన్నారు. ఎన్నో సినిమాలలో ఎన్నో అద్భుతమైన పాత్రలు పోషించిన శ్రీదేవి అందరి గుండెల్లో చిరస్థాయిగా నిలిచిపోయారని చెప్పారు.

శ్రీదేవి మృతిపై కృష్ణంరాజు

శ్రీదేవి మృతిపై నటుడు, మాజీ ఎంపీ కృష్ణంరాజు స్పందించారు. ఆమె మృతి సినీ పరిశ్రమను షాక్‌కు గురి చేసిందన్నారు. కూతురు భవిష్యత్తును చూడకుండానే వెళ్లిపోవడం బాధాకరమన్నారు. సెట్‌లో హుందాగా, గౌరవంగా వ్యవహరించేవారని చెప్పారు. భారత చిత్ర పరిశ్రమ షాకైందన్నారు.

శ్రీదేవి మృతిపై హేమమాలిని

ఎందరో నటీమణులకు శ్రీదేవి ఆదర్శం అని బీజేపీ ఎంపీ, నటి హేమమాలిని అన్నారు. సినీ జీవితంలో ఆమె చెరగని ముద్ర వేశారన్నారు. శ్రీదేవి జీవితం మొత్తం నటనలోనే సరిపోయిందని చెప్పారు.

ఆమె ఆత్మకు శాంతి కలగాలి

నటి శ్రీదేవి మృతికి కేంద్రమంత్రి రాజ్‌నాథ్ సింగ్ సంతాపం తెలిపారు. శ్రీదేవి హఠాత్మరణం తెలిసి షాకయ్యానని చెప్పారు. మరిచిపోలేని ప్రతిభతో ఆమె తన మార్క్ చూపించారన్నారు. ఆమె మృతి సినిమా పరిశ్రమకు పెద్ద లోటు అన్నారు. ఆమె ఆత్మకు శాంతికలగాలన్నారు.

మా ఇంట్లో ఎదిగిన పిల్ల

శ్రీదేవి తమ ఇంట్లో ఎదిగిన పిల్ల అని నటుడు కృష్ణ అన్నారు. చెన్నైలో ఆమెది, తమది పక్క పక్క ఇల్లేనని చెప్పారు. ఆమె మృతికి సంతాపం తెలిపారు. శ్రీదేవి పోషించిన పాత్రల్లో ఎవరూ చేయలేనంత గొప్పగా నటించిందని కృష్ణం రాజు అన్నారు. కాగా శ్రీదేవి మృతికి ప్రధాని నరేంద్ర మోడీ, కాంగ్రెస్ పార్టీ అధ్యక్షులు రాహుల్ గాంధీలు సంతాపం ప్రకటించారు.

Published On February 25, 2018