వెంటనే స్థలం ఖాళీ చేయండి: వందేళ్ల లల్లాగూడ చర్చికి రైల్వే ఎవిక్షన్ నోటీసులు

Lallaguda Sacred Heart Church: హైదరాబాద్‌ లల్లాగూడలోని శాక్రిడ్ హార్ట్ క్యాథలిక్ చర్చికి రైల్వే అధికారులు షాక్ ఇచ్చారు. వెంటనే ఈ స్థలాన్ని ఖాళీ చేయాలంటూ ఆదేశాలు ఇచ్చారు. ఈ మేరకు ఎవిక్షన్ నోటీసులను జారీ చేశారు. ఈ నోటీసుల పట్ల క్రైస్తవ సంఘాలు అభ్యంతరం వ్యక్తం చేస్తోన్నాయి.

లల్లాగూడలో సుమారు వందేళ్ల కిందట ఈ క్యాథలిక్ చర్చి నిర్మితమైంది. 1927లో నిర్మాణాన్ని పూర్తి చేసుకుంది. అప్పట్లోనే దీన్ని నిర్మించడానికి 7,000 రూపాయలు వ్యయం చేసినట్లు చెబుతున్నారు. దీని నిర్మాణానికి అప్పటి నిజాం నవాబుల ప్రభుత్వం 1,000 రూపాయలను విరాళంగా ఇచ్చింది.

ఈ చర్చి స్థలం తమకు చెందినదని, ఎలాంటి అనుమతులు లేకుండా దీన్ని నిర్మించారని రైల్వే మంత్రిత్వ శాఖ చెబుతోంది. ఈ స్థలాన్ని ఖాళీ చేయాలంటూ దక్షిణ మధ్య రైల్వే అధికారులు నోటీసులు ఇచ్చినట్లు ది టైమ్స్ ఆఫ్ ఇండియా ఓ ప్రత్యేక కథనాన్ని ప్రచురించింది. స్థలాన్ని ఖాళీ చేయడానికి నెల రోజుల గడువు ఇచ్చారు రైల్వే అధికారులు.

అలా చేయకపోతే పబ్లిక్ ప్రెమిసెస్ (ఆక్రమణదారుల తొలగింపు) చట్టం- 1971 ప్రకారం తొలగింపు ప్రక్రియను చేపడతామని, అలాగే నిర్వాహకులపై చట్టపరమైన చర్యలను తీసుకునే అవకాశం ఉందని హెచ్చరించారు. లల్లాగూడ ఎస్‌ఎల్‌డీజీ ఆఫీసర్స్ అండ్ స్టాఫ్ కాలనీలో ఉన్న తమ భూమిలో ఈ చర్చిని చట్టవిరుద్ధంగా నిర్మించారని దక్షిణ మధ్య రైల్వే అధికారులు ఈ నోటీసుల్లో స్పష్టం చేశారు.

నిజాం గ్యారెంటీడ్ స్టేట్ రైల్వే కంపెనీకి చెందిన లోకో హెడ్ క్వార్టర్స్‌గా ఉంటూ వస్తోంది లల్లాగూడ. 1927 ఫిబ్రవరిలో అప్పటి రైల్వే అధికారులు చర్చి నిర్మాణానికి కొంత స్థలాన్ని కేటాయించారని, ఈ మేరకు ఒప్పందాలు కూడా కుదుర్చుకున్నాయని టైమ్స్ ఆఫ్ ఇండియా తన కథనంలో పేర్కొంది.

చర్చి నిర్మాణానికి 1927 మార్చిలో అనుమతులు జారీ అయ్యాయని, అదే సంవత్సరం జూలైలో నిర్మాణాన్ని ప్రారంభించారు. ఆ తరువాత అందులో మార్పులు చేర్పులు చోటు చేసుకుంటూ వచ్చాయి. ఫాదర్ మదను ఆరోగ్యం, ఆర్చ్ బిషప్ సామినేని అరులప్ప ఫాదర్ చొప్పరపు ఆరోగ్యం, ఆర్చ్ బిషప్ మారంపూడి జోజి క్రమంగా దీన్ని విస్తరించారు.

English summary

Sacred Heart Church, the parish church of Catholic community in South Lallaguda of Hyderabad, has been issued a vacation notice by the South Central Railway (SCR).