వంటనూనె ప్యాకెట్‌లో ఎలుక: యాజమాన్యం నిర్లక్ష్యపు సమాధానం(వీడియో)

Published: Thursday, December 24, 2015, 17:32 [IST]

హైదరాబాద్: నగరంలో మంచిపేరున్న సూపర్ మార్కెట్‌లో కొనుగోలు చేసిన ఓ వంటనూనె ప్యాకెట్‌లో చనిపోయిన ఎలుక కనిపించింది. దీంతో ఆందోళన చెందిన వినియోగదారులు ఆ సూపర్‌మార్కెట్ యజమాన్యాన్ని ప్రశ్నిస్తే.. వారికి నిర్లక్ష్యపు సమాధానమే ఎదురైంది. ఈ ఘటన నగరంలోని రామంతాపూర్‌లో చోటుచేసుకుంది.

బాధితుడు, దూరదర్శన్‌లో పనిచేసే చక్రపాణి ఘటనకు సంబంధించిన వివరాలను తెలిపారు. గత పది రోజుల క్రితం ఆయన భార్య అరుణ రామంతాపూర్ ఉన్న డీమార్ట్ సూపర్ మార్కెట్‌లో అంబ్రెల్లా అనే బ్రాండ్‌కు చెందిన 5 వంటనూనె ప్యాకెట్లను కొనుగోలు చేశారు. అందులో ఒకదానిలో చనిపోయిన ఎలుక కనిపించింది.

ఊహించని పరిణామం ఎదురవడంతో ఆశ్చర్యపోయిన అరుణ నూనె ప్యాకెట్‌ను తీసుకొని డీమార్ట్‌కు వెళ్లారు. నూనె ప్యాకెట్‌లో ఎలుక వచ్చిన విషయాన్ని సూపర్ మార్కెట్ నిర్వాహకుల దృష్టికి తీసుకువెళ్లారు.

అయితే, తమకు ఈ నూనె ప్యాకెట్‌తో సంబంధం లేదని, దానిని తాము తయారుచేయలేదని యాజమాన్యం బదులిచ్చారు. అంతేగాక, సంబంధిత బ్రాండ్ కంపెనీని సంప్రదించండని నిర్లక్ష్యంగా చెప్పారని చక్రపాణి తెలిపారు.