ఎమ్మెల్యే ధర్మారెడ్డికి తృటిలో తప్పిన ప్రమాదం

వరంగల్: పరకాల ఎమ్మెల్యే చల్లా ధర్మారెడ్డికి తృటిలో పెను ప్రమాదం తప్పింది. సోమవారం రాత్రి హైదరాబాద్-వరంగల్ జాతీయ రహదారిపై జనగామ శివారులో జరిగిన రోడ్డు ప్రమాదంలో చల్లా ధర్మారెడ్డి స్వల్ప గాయాలతో బయటపడ్డారు. ఈ ఘటనలో నలుగురికి తీవ్ర గాయాలుకాగా... ఇద్దరి పరిస్థితి విషమంగా ఉంది.

ఘటనకు సంబంధించిన వివరాలిలా ఉన్నాయి. ఎమ్మెల్యే ధర్మారెడ్డి తన భార్య జ్యోతి, కూతుళ్లు మానస, జాహ్నవి, మనవరాలు మూడు నెలల పాపతో కలసి ఇన్నోవాలో హైదరాబాద్ నుంచి వరంగల్ వైపు వెళ్తున్నారు. వర్ధన్నపేట మండలం రాపర్తికి చెందిన అయిత కుమార్(కారు యజమాని, కారు నడుపుతన్నాడు), వెంకటలక్ష్మి... పిల్లలు హరీష్, అభిలు హైదరాబాద్‌లో ఉంటూ జాఫర్‌గఢ్‌లో ఓ వివాహానికి హాజరై హైదరాబాద్‌కు ఇండికా కారులో తిరుగు ప్రయాణమయ్యారు.

కాగా, ఈ క్రమంలో జనగామ శివారులోని ఉడుముల ఆస్పత్రి వద్ద వీరి ఇండికా వాహనం వేగంగా వచ్చి ఎమ్మెల్యే చల్లా ప్రయాణిస్తున్న కారును ఢీ కొట్టింది. ఈ ఘటనలో ఎమ్మెల్యే చల్లా ధర్మారెడ్డి, భార్య జ్యోతి, పెద్ద కూతురు మానస, మానస కూతురైన మూడు నెలల పాప, డ్రైవర్ అడాల సతీష్ స్వల్ప గాయాలతో బయటపడగా.. జాహ్నవి తలకు తీవ్ర గాయమై రక్త స్రావమైంది. ఇండికా కారులో ఉన్న అయితకుమార్, వెంకటలక్ష్మి తల, చేతులకు తీవ్ర గాయూలు కాగా... నిర్మల చేయి విరిగిపోయింది.

వెంకటలక్ష్మి కొడుకులు హరీశ్, అభి స్వల్ప గాయాలతో బయటపడ్డారు. వీరిని చికిత్స నిమిత్తం జనగామ ఏరియా ఆస్పత్రికి తరలించారు. వెనుక మరోకారులో వస్తున్న టిఆర్‌ఎస్ జనగామ మండల శాఖ అధ్యక్షుడు కళింగరాజు ప్రమాద ఘటనను చూసి ఎమ్మెల్యేను, ఆయన కుటుంబ సభ్యులను భువనగిరి వరకు తీసుకొచ్చారు. అక్కడి నుంచి అంబులెన్స్‌లో హైదరాబాద్‌కు పంపించారు. ప్రస్తుతం ఆస్పత్రిలో చికిత్స పొందుతున్న వారందరూ క్షేమంగా ఉన్నట్లు సమాచారం.

English summary

MLA Dharma Reddy on Monday night narrowly missed a road accident.