Spy Camera in Girls Hostel: గర్ల్స్ హాస్టల్‌లో స్పై కెమెరా కలకలం..!

Spy Camera in Girls Hostel: రోజురోజుకు మహిళలు, విద్యార్థినిల పట్ల అఘాయిత్యాలు రోజురోజుకూ పెరిగిపోతున్నాయి. ఎన్ని చట్టాలను తీసుకొచ్చినా మహిళలకు రక్షణ లేకుండా పోయింది. దూరప్రాంతాల నుంచి వచ్చి డబ్బులిచ్చి ఆశ్రయం పొందుతున్న హాస్టల్ లో విద్యార్థినులను కూడా దుర్మార్గులు వదలడం లేదు. విద్యార్థినులు ఉంటున్న హాస్టల్ లో సీక్రెట్ కెమెరాలు ఏర్పాటు చేసిన ఘటన తాజాగా వెలుగులోకి వచ్చింది. హాస్టల్ యజమానే సీక్రెట్ కెమెరాలు ఏర్పాటు చేసిన ఈ ఘటన విస్మయానికి గురి చేస్తోంది. సంగారెడ్డి జిల్లా కిష్టారెడ్డిపేట పరిధిలోని మైత్రి విల్లాస్ లోని లేడీస్ హాస్టల్ లో నిర్వాహకుడు స్పై కెమెరా ఏర్పాటు చేశాడు. స్పై కెమెరాకు మెమొరీ కార్డును అటాచ్ చేసి వీడియోలను స్టోర్ చేశాడు.

కిష్టారెడ్డి పేట పరిధిలోని మైత్రి విల్లాస్ లో బండారు మహేశ్వర్ అనే వ్యక్తి లక్ష్మీ గర్ల్స్ హాస్టల్ ను నడుపుతున్నాడు. ఆ వసతి గృహంలో 30 మంది అమ్మాయిలు నివాసం ఉంటున్నారు. శుక్రవారం హాస్టల్ లో ఉంటున్న విద్యార్థినులు సీక్రెట్ కెమెరాను గుర్తించారు. అనంతరం ఆ అమ్మాయిలంతా కలిసి వెళ్లి పోలీసులకు ఫిర్యాదు చేశారు. హాస్టల్ విద్యార్థినుల ఫిర్యాదు మేరకు కేసు నమోదు చేసి.. గుట్టు చప్పుడు కాకుండా వెళ్లి హాస్టల్ గదులను వెతకగా.. ఈ వ్యవహారం నిజమేనని నిగ్గు తేల్చారు. సీక్రెట్ కెమెరాలోని పలు మెమోరీ కార్డులను పరిశీలించారు. ఈ క్రమంలో హాస్టల్ యజమాని బండారు మహేశ్వర్ ను పోలీసులు అరెస్ట్ చేసి విచారిస్తున్నారు. సీక్రెట్ కెమెరా వ్యవహారం బయటపడడంతో విద్యార్థినులు తీవ్ర ఆందోళనకు గురవుతున్నారు. ఆ సీక్రెట్ కెమెరాలో తమ ప్రైవేట్ వీడియోలు ఉన్నట్లు బాధితులు వాపోతున్నారు.

బండారు మహేశ్వర్ గత నాలుగేళ్లుగా గర్ల్స్ హాస్టల్ నడుపుతున్నాడు. అయితే ఈ వ్యక్తి తన నీచబుద్ధిని బయటపెట్టాడు. గత నాలుగేళ్లుగా ఈ సీక్రెట్ కెమెరా వ్యవహారం నడుస్తున్నట్లు తెలుస్తోంది. ఇప్పటి వరకు పోలీసులు మూడు సీక్రెట్ కెమెరాలు, చిప్ ను స్వాధీనం చేసుకున్నట్లు తెలిసింది. అమీన్ పూర్ పోలీస్ స్టేషన్ లో నిందితుడిని విచారిస్తున్నారు. గతంలో కూడా ఇలాంటి సీక్రెట్ కెమెరా పెట్టాడా.. అనే అనుమానాలు వ్యక్తం అవుతున్నాయి. ఈ నేపథ్యంలో అన్ని కోణాల్లో పోలీసులు విచారణ చేపట్టారు.

English summary

Spy Camera in Girls Hostel in Sangareddy District