సంగీతపై మళ్లీ దాడి: ఈసారి మరిది, అత్తమామలు?, తమ్ముడు వచ్చినందుకే!

Published: Monday, March 5, 2018, 8:55 [IST]

హైదరాబాద్: భర్త, అత్తారింటి నుంచి గత కొన్నాళ్లుగా తీవ్ర వేధింపులు ఎదుర్కొంటున్న సంగీతపై మరోసారి అత్త మామలు, మరిది దాడికి దిగారు. దీంతో సంగీత మేడిపల్లి పోలీసులకు ఫిర్యాదు చేశారు. సంగీత ఫిర్యాదు మేరకు . మామ బాల్‌రెడ్డి, మరిది శ్రీధర్‌రెడ్డిని అదుపులోకి తీసుకున్నారు. కోర్టు తీర్పు మేరకు సంగీత భర్త ఇంట్లోనే ఉంటున్న సంగతి తెలిసిందే.

భర్త ఇంట్లోనే ఉంటున్న సంగీత..:

భర్త తనను ఇంటి నుంచి గెంటేయడమే కాక, మరో యువతిని వివాహం చేసుకోవడంతో భర్త ఇంటి ఎదుటే సంగీత ఇన్నాళ్లు న్యాయపోరాటం చేస్తూ వచ్చారు. అయితే కోర్టు తీర్పు మేరకు ఆమె ఎట్టకేలకు తిరిగి భర్త ఇంట్లో అడుగుపెట్టారు. బోడుప్పల్‌ శ్రీనగర్‌ కాలనీలో భర్త, టీఆర్‌ఎస్‌ మాజీ నేత కె.శ్రీనివాస్‌ రెడ్డి నివాసంలో ఆమె ఉంటున్నారు.

ఆదివారం దాడి:

ఆదివారం సాయంత్రం సంగీత వద్దకు ఆమె తమ్ముడు రంజిత్ రెడ్డి వచ్చారు. దీంతో ఇక్కడికెందుకు వచ్చావంటూ మద్యం మత్తులో ఉన్న సంగీత మరిది శ్రీధర్ రెడ్డి అతనిపై దాడికి దిగారు. దాడి సమయంలో.. సంగీత దాన్ని వీడియో తీస్తుండగా అత్తమామలు, మరిది ఆమెపై దాడికి యత్నించారు. దీంతో సంగీత మేడిపల్లి పోలీసులకు ఫిర్యాదు చేసింది.

భర్త వేధింపులు:

బోడుప్పల్‌ శ్రీనగర్‌ కాలనీలో నివసించే రియల్ ఎస్టేట్ వ్యాపారి పూలకండ్ల శ్రీనివాస్‌రెడ్డి శేరిలింగంపల్లి పాపిరెడ్డికాలనీకి చెందిన సంగీతను 2013లో వివాహం చేసుకున్నాడు. అయితే అంతకుముందే అతనికి మరో వివాహమైన విషయాన్ని దాచిపెట్టాడన్న ఆరోపణలున్నాయి. సంగీతకు ఆడపిల్ల పుట్టడంతో గతేడాది నవంబరు 19న ఇంటి నుంచి గెంటేశాడు. అప్పటినుంచి ఆమె భర్త ఇంటి ఎదుటే న్యాయపోరాటానికి దిగింది.

వదిలించుకోవడానికేనా?:

మహిళా సంఘాలు, రాజకీయ నాయకుల చొరవతో సంగీత చేసిన న్యాయపోరాటానికి కోర్టు కూడా బాసటగా నిలిచిన సంగతి తెలిసిందే. కోర్టు తీర్పు మేరకు ఆమె భర్త ఇంట్లోనే ఉంటుండటంతో.. తిరిగి ఆమెను వదిలించుకోవడానికి శ్రీనివాస్ రెడ్డి ప్రయత్నిస్తున్నాడా? అన్న అనుమానాలు మొదలయ్యాయి. తాజా దాడి అందుకు ఊతమిచ్చేలా ఉందంటున్నారు.

Published On March 5, 2018