రేపు మధ్యాహ్నం 3 గంటలకు తెలంగాణ కేబినెట్ భేటీ: కీలక అంశాలు లేకుండానే

తెలంగాణ రాష్ట్ర మంత్రివర్గ సమావేశానికి కేంద్ర ఎన్నికల సంఘం అనుమతి లభించిన విషయం తెలిసిందే. ఈ క్రమంలో సోమవారం మధ్యాహ్నం 3 గంటలకు కేబినెట్​ భేటీ జరగనుంది. శనివారం జరగాల్సిన సమావేశం ఈసీ అనుమతి లభించక వాయిదా పడింది. ఆదివారం ఈసీ రాష్ట్ర మంత్రివర్గ సమావేశం నిర్వహణకు అనుమతి ఇచ్చింది. అయితే అత్యవసర విషయాలపై మాత్రమే చర్చించాలని షరతులు విధిస్తూ కేబినెట్ భేటీకి గ్రీన్​ సిగ్నల్​ ఇచ్చింది.

జూన్​ 4వ తేదీ లోపు చేపట్టాల్సిన అత్యవసర అంశాలపై మాత్రమే చర్చించాలని కేంద్ర ఎన్నికల సంఘం స్పష్టం చేసింది. అలాగే ఏజెండాలోని రైతు రుణమాఫీ, హైదరాబాద్​ ఉమ్మడి రాజధానికి సంబంధించిన అంశాలను జూన్​ 4వ తేదీ వరకు పక్కన పెట్టాలని రాష్ట్ర ప్రభుత్వానికి ఎన్నికల కమిషన్​ తేల్చి చెప్పింది. తెలంగాణ రాష్ట్రంలో లోక్‌​సభ ఎన్నికల నిర్వహణలో భాగస్వామ్యం ఉన్న అధికారులు కేబినెట్​ భేటీకి హాజరుకావద్దని ఆదేశించింది.

కాగా, రైతు రుణమాఫీ, ఏపీ-తెలంగాణ మధ్య విభజన అంశాలతో పాటు ధాన్యం కొనుగోళ్లు,ఖరీఫ్​ పంటల ప్రణాళిక, ఇంకా రైతులకు సంబంధించిన అనేక అంశాలు, పాఠశాల విద్యాసంవత్సరం ప్రారంభానికి సన్నాహకాలపైన శనివారం కేబినెట్​ సమావేశం నిర్వహించాలని ప్రభుత్వం భావించింది.

అంతేగాక, జూన్​ 2న తెలంగాణ ఆవిర్భావ దినోత్సవాల నిర్వహణపై కూడా సీఎం రేవంత్ చర్చించాలని భావించారు అయితే సార్వత్రిక ఎన్నికల కోడ్​, వరంగల్​-నల్గొండ-ఖమ్మం పట్టభద్రుల ఎమ్మెల్సీ ఎన్నికల కోడ్​ అమల్లో ఉండటంతో మంత్రిమండలి సమావేశ నిర్వహణకు అనుమతి ఇవ్వాలని ప్రభుత్వం ఈసీని కోరింది. ఈ క్రమంలో పలు షరతులతో విధించిన ఈసీ.. కేబినెట్ భేటీకి అనుమతిచ్చింది.

English summary

Telangana cabinet meeting on tomorrow 3pm.