పులుల గర్జనతో గ్రీన్ తెలంగాణ! నల్లమల అడవుల్లో అరుదైన రికార్డ్

పచ్చదనం అంటే కేవలం చెట్లు కాదు.. పర్యావరణ భద్రత, జీవ వైవిధ్యం, భవిష్యత్ తరాలకు భరోసా. ఈ విషయంలో తెలంగాణ రాష్ట్రం దక్షిణ భారతదేశంలో ముందంజలో నిలుస్తోంది. రాష్ట్ర భౌగోళిక విస్తీర్ణంలో 24.69 శాతం అడవులు ఉండగా, ఇది జాతీయ సగటు 23.59 శాతం కంటే ఎక్కువగా ఉండటం విశేషం. సామాజిక, ఆర్థిక సర్వేలో ప్రభుత్వం వెల్లడించిన ఈ గణాంకాలు, రాష్ట్రం పచ్చదనంపై చూపుతున్న దృష్టిని స్పష్టంగా చూపిస్తున్నాయి.

అడవుల విస్తీర్ణం పెరుగుదలతో పాటు, వన్యప్రాణుల సంరక్షణలోనూ రాష్ట్రం గణనీయమైన పురోగతి సాధిస్తోంది. ముఖ్యంగా నల్లమల అడవుల్లోని అమ్రాబాద్ టైగర్ రిజర్వ్‌లో పెద్దపులుల సంఖ్య పెరగడం ఆశాజనకంగా మారింది. 2018లో కేవలం 12గా ఉన్న పులుల సంఖ్య, 2026 నాటికి 42కి చేరడం వన్యప్రాణి సంరక్షణ చర్యల ఫలితంగా భావిస్తున్నారు.

రాష్ట్ర ప్రభుత్వం వనమహోత్సవ కార్యక్రమాన్ని ప్రధాన ఆయుధంగా ఉపయోగిస్తూ అడవుల విస్తీర్ణాన్ని 33 శాతానికి పెంచే లక్ష్యంతో ముందుకెళ్తోంది. ఈ క్రమంలో 2024-25లో 19.03 కోట్లు, 2025-26లో 15.73 కోట్ల మొక్కలను నాటింది. దీంతో రాష్ట్రంలోని మొత్తం అటవీ విస్తీర్ణం 27,688 చదరపు కిలోమీటర్లకు పెరిగింది. ఇది రాష్ట్ర భూభాగంలో 24.69 శాతంగా నమోదైంది.

తెలంగాణ ప్రత్యేక స్థానం..

జీవ వైవిధ్యం పరంగా కూడా తెలంగాణ ప్రత్యేక స్థానాన్ని సంపాదించింది. రాష్ట్రంలో మొత్తం 2,939 వృక్ష, మొక్కల జాతులు, 365 పక్షి జాతులు నమోదయ్యాయి. అదనంగా, కవ్వాల్ టైగర్ రిజర్వ్‌లో పులులు, చిరుతల ఉనికి కూడా రాష్ట్రంలో వన్యప్రాణి సంరక్షణకు ఉన్న ప్రాముఖ్యతను సూచిస్తోంది.

నాగర్ కర్నూల్ టాప్, కరీంనగర్ లాస్ట్..

జిల్లాల వారీగా అటవీ విస్తీర్ణాన్ని పరిశీలిస్తే నాగర్‌కర్నూల్ జిల్లా 35.81 శాతంతో అగ్రస్థానంలో నిలవగా, నిర్మల్ (29.83), ఆదిలాబాద్ (29.51), మహబూబాబాద్ (26.49) జిల్లాలు తదుపరి స్థానాల్లో ఉన్నాయి. మరోవైపు హైదరాబాద్ (10.99), నల్గొండ (9.57), సూర్యాపేట (4.67), కరీంనగర్ (2.29) వంటి జిల్లాల్లో అటవీ విస్తీర్ణం తక్కువగా ఉండటం గమనార్హం.

మొత్తానికి, పచ్చదనాన్ని పెంపొందించడంలో తెలంగాణ తీసుకుంటున్న చర్యలు ఫలితాన్నిస్తున్నాయి. వనమహోత్సవం వంటి కార్యక్రమాలు, వన్యప్రాణి సంరక్షణ చర్యలు కలిసి రాష్ట్రాన్ని పర్యావరణ పరిరక్షణలో ఆదర్శంగా నిలబెడుతున్నాయి. ఇదే దిశలో ప్రయత్నాలు కొనసాగితే, 33 శాతం అటవీ లక్ష్యం కూడా సాధ్యమేనని నిపుణులు భావిస్తున్నారు.

English summary

Telangana ranks first in South India for forest cover at 24.69%, exceeding the national average. Tiger population rises significantly in Amrabad Tiger Reserve as the state aims for 33% green cover.