యాంకర్ విష్ణుప్రియ ఇంట తీవ్ర విషాదం: ఇన్‌స్టాలో భావోద్వేగ పోస్టు

బుల్లితెర నటి, యాంకర్ విష్ణుప్రియ ఇంట తీవ్ర విషాదం నెలకొంది. గురువారం విష్ణుప్రియ తల్లి కన్నుమూశారు.

Updated: Friday, January 27, 2023, 12:37 [IST]

హైదరాబాద్: బుల్లితెర నటి, యాంకర్ విష్ణుప్రియ ఇంట తీవ్ర విషాదం నెలకొంది. గురువారం విష్ణుప్రియ తల్లి కన్నుమూశారు. ఈ విషయాన్ని విష్ణు ప్రియ తన ఇన్‌స్టాగ్రామ్ ఖాతా ద్వారా తెలియజేసింది. తన తల్లిని గుర్తు చేసుకుంటూ విష్ణుప్రియ భావోద్వేగానికి గురైంది.

మై డియర్ అమ్మా అంటూ కన్నీటిపర్యంతమైన విష్ణుప్రియ

'మై డియర్ అమ్మా.. ఈ రోజు వరకూ నాతో ఉన్నందుకు ధన్వవాదాలు. నీతో గడిపిన ప్రతి క్షణాన్ని నా చివరి శ్వాస వరకూ గుర్తు చేసుకుంటూనే ఉంటా. నువ్వే నా బలం. అలాగే బలహీనత కూడా. ఇకపై ప్రతిక్షణం నువ్వు నాతోనే ఉంటావు. నువ్వు ప్రతిచోట, నా ప్రతి శ్వాసలోనూ ఉంటావు. అలా, నేను బలాన్ని పొందుతాను. ఈ భూమ్మీద నాకంటూ ఓ మంచి జీవితం ఇవ్వడం కోసం నువ్వు చేసిన త్యాగాలన్నింటికీ నేను ఎప్పటికీ రుణపడి ఉంటాను. రెస్ట్ ఇన్ పీస్ అమ్మా' అంటూ విష్ణుప్రియ కన్నీటిపర్యంతమైంది.

నీ ముద్దులు లేవంటూ తల్లిపై విష్ణుప్రియ భావోద్వేగం

తన తల్లిని హత్తుకున్న మరో ఫొటోను షేర్ చేస్తూ.. 'ఇకపై నీ ముద్దులను మిస్ అవుతాను అమ్మా' అని విష్ణుప్రియ భావోద్వేగంగా పేర్కొంది. కాగా, ఈ వార్తను తెలుసుకున్న బుల్లితెర నటీనటులు, యాంకర్లు దిగ్భ్రాంతి వ్యక్తం చేశారు. విష్ణుప్రియకు ధైర్యం చెబుతూ పలువురు బుల్లితెర నటులు, నెటిజన్లు కామెంట్లు పెడుతున్నారు. ఆమె మాతృమూర్తి ఆత్మకు శాంతి చేకూరాలని ప్రార్థిస్తున్నారు.

యూట్యూబర్ నుంచి పాపులర్ యాంకర్‌గా విష్ణుప్రియకు గుర్తింపు

విష్ణుప్రియ కెరీర్ విషయానికొస్తే.. ఒక యూట్యూబర్‌గా ప్రారంభించిన విష్ణుప్రియ.. ఈటీవీలో ప్రసారమైన 'పోవే పోరా'తో మంచి గుర్తింపు తెచ్చుకున్నారు. ఓ వైపు యాంకర్‌గా.. మరో వైపు బుల్లితెర నటిగానూ రాణిస్తున్నారు విష్ణుప్రియ. ఇటీవల విడుదలైన వాంటెట్ పండుగాడు సినిమాలోనూ విష్ణుప్రియ నటించారు. కాగా, ఇటీవల విష్ణుప్రియ స్నేహితురాలైన జబర్దస్త్ రీతూ చౌదరి తండ్రి మరణించారు. ఇప్పుడు విష్ణుప్రియ తల్లి మరణించడంతో ఇద్దరు స్నేహితులు విషాదంలో ఉన్నారు.