ప్రయాణీకులకు TGSRTC తీపి కబురు, ఈ బస్సుల్లో ఛార్జీల తగ్గింపు..!!

తెలంగాణ ఆర్టీసీ ప్రయాణీకులకు తీపి కబురు అందించింది. హైదరాబాద్ లో ప్రయాణించే బస్సు ల ఛార్జీలను తగ్గించింది. నిర్దేశించిన కేటగిరీల్లో టికెట్ ధరలను తగ్గిస్తూ అన్ని డిపోలకు ఆర్టీసీ యాజమాన్యం సర్క్యులర్ జారీ చేసింది. నగరంలో ప్రయాణీకుల ఆక్యుపెన్సీ రేషియో పెంచుకునే క్రమంలో భాగంగా ఆర్టీసీ ఈ నిర్ణయం తీసుకుంది. ఏ బస్సులో ఎంత మేర రిబేటు ఇస్తుందీ ఆర్టీసీ అధికారులు వెల్లడించారు.

వేసవిలో తెలంగాణ ఆర్టీసీ కీలక నిర్ణయం తీసుకుంది. హైదరాబాద్ పరిధిలో నడిచే మెట్రో డీలక్స్, ఈ-మెట్రో ఏసీ బస్సుల టికెట్ ధరలను తగ్గిస్తూ ఆర్టీసీ యాజమాన్యం కీలక నిర్ణయం తీసుకుంది. ఈ నిర్ణయం ద్వారా ప్రయాణికులపై ఆర్థిక భారం తగ్గడమే కాకుండా, ఎండల నుంచి ఉపశమనం పొందేందుకు ఏసీ బస్సులను ఆశ్రయించే వారి సంఖ్య పెరుగుతుందని అధికారులు అంచనా వేస్తున్నారు. గరంలో ప్రస్తుతం 275 మెట్రో డీలక్స్​ బస్సులు 255 ట్రిప్పులు, 90 ఎలక్ట్రిక్​ ఏసీ బస్సులు 731 ట్రిప్పులు తిరుగుతున్నాయి. వీటిలో 60 శాతానిపైగా ఆక్యుపెన్సీనే లేదు. ఈ నేపథ్యంలో ఇప్పుడున్న ధరలను సవరించాలని ఆర్టీసీ నిర్ణయించింది.

ప్రయాణీకులకు వెసులుబాటు

మెట్రో డీలక్స్​ బస్సులో గతంలో నాలుగు కిలోమీటర్ల ప్రయాణానికి రూ.30 టికెట్​ ఉండగా, ప్రస్తుతం దాన్ని రూ.25కు తగ్గించారు. ఇక ఈ-మెట్రో ఏసీ సర్వీసులో గతంలో రూ.35 ఉండగా ఇప్పుడు రూ.25కి తగ్గించారు. గ్రేటర్​ హైదరాబాద్​లో మరిన్ని ఎలక్ట్రిక్​ బస్సులు త్వరలోనే రోడ్లపై పరుగులు పెట్టనున్నాయి. నగరంలో ప్రజా రవాణాను మరింత వేగవంతం చేయడానికి కేంద్ర ప్రభుత్వం అందిస్తున్న పీఎం ఈ డ్రైవ్​ పథకం కింద ఆర్టీసీ ఎలక్ట్రిక్​ బస్సులను అందుబాటులోకి తీసుకురానుంది. రాబోయే రోజుల్లో విద్యుత్​ రవాణా వ్యవస్థ దిశగా మరింత ముందుకు తీసుకెళ్లడంలో భాగంగా సంస్థ 1085 ఎలక్ట్రిక్​ బస్సులను ప్రవేశ పెడుతున్నట్లు అధికారులు వెల్లడించారు.

English summary

TGSRTC announce rebate for selected services in Hyderabad city during summer for increase occupancy ratio