ఏపీని వీడిన పెద్దపులి. ఆకలి తీర్చుకునేందుకు తెలంగాణలోకి ఎంట్రీ..
పచ్చని అడవుల మధ్య ప్రశాంతంగా ఉండే ఆంధ్రా-తెలంగాణ సరిహద్దు గ్రామాల్లో ఇప్పుడు ఒక్కసారిగా టెన్షన్ ఆవహించింది. చీకటి పడితే చాలు గడప దాటాలంటేనే జనం హడలిపోతున్నారు. ఆహారం కోసం అన్వేషిస్తూ పొరుగు రాష్ట్రమైన ఆంధ్రప్రదేశ్ అడవుల నుంచి ఓ పెద్దపులి తెలంగాణ భూభాగంలోకి అడుగుపెట్టడమే ఇందుకు కారణం. భద్రాద్రి కొత్తగూడెం జిల్లా అశ్వారావుపేట మండల పరిధిలోని గిరిజన తండాలు, సరిహద్దు పల్లెల్లో ప్రస్తుతం ఈ వ్యాఘ్రం సంచారం తీవ్ర భయాందోళనలను రేకెత్తిస్తోంది.
ఆంధ్రప్రదేశ్‌లోని ఏలూరు జిల్లా అటవీ ప్రాంతం నుంచి ఈ పెద్దపులి సరిహద్దు దాటి తెలంగాణలోకి ప్రవేశించింది. అశ్వారావుపేట ఫారెస్ట్ ఆఫీసర్ ఎం. మురళి వెల్లడించిన వివరాల ప్రకారం.. ఈ పులి మొదట కవాడిగుండ్ల, చెన్నాపురం అటవీ ప్రాంతాల మీదుగా ప్రయాణించి గురువారం రాత్రి గండ్లగూడెం గ్రామ శివార్లకు చేరుకుంది. ఆకలి తీర్చుకునే క్రమంలో వేట కోసం వెతుకుతూ ఇది జనవాసాలకు సమీపంలోకి వచ్చి ఉంటుందని అధికారులు అంచనా వేస్తున్నారు.
జీపీఎస్ సిగ్నల్స్ ఆధారంగా నిఘా
ఈ పెద్దపులి మెడకు గతంలోనే ఏపీ అటవీ శాఖ అధికారులు రేడియో కాలర్‌ను అమర్చారు. ఆ జీపీఎస్ ట్రాకర్ నుంచి అందిన చివరి సిగ్నల్స్ ప్రకారం.. ఇది రేగళ్ల, బచ్చువారిగూడెం అటవీ ప్రాంతాల్లో సంచరించినట్లు ఏలూరు జిల్లా అధికారులు గుర్తించారు. పులి కదలికలను ఎప్పటికప్పుడు ట్రాక్ చేస్తూ, అది జనావాసాల వైపు రాకుండా దట్టమైన అడవిలోకి మళ్లించేందుకు రెండు రాష్ట్రాల అటవీ సిబ్బంది సమన్వయంతో పనిచేస్తున్నారు.
రంగంలోకి ప్రత్యేక టాస్క్‌ఫోర్స్ బృందాలు
పులి సంచారం నేపథ్యంలో అశ్వారావుపేట మండలంలో అటవీ శాఖ హై అలర్ట్ ప్రకటించింది. పులి జాడను కనిపెట్టేందుకు, ప్రజలకు ఎలాంటి హాని జరగకుండా చూసేందుకు ప్రత్యేక టాస్క్‌ఫోర్స్ బృందాలను రంగంలోకి దించారు. సరిహద్దు ప్రాంతాలైన గొల్లమడుగు, కవాడిగుండ్ల, హెచ్.వారిగూడెం తదితర అటవీ ప్రాంతాల్లో సిబ్బంది రాత్రింబవళ్లు గస్తీ కాస్తున్నారు. గ్రామాల్లోకి వెళ్లి ప్రజలకు తీసుకోవాల్సిన జాగ్రత్తలపై అవగాహన కల్పిస్తున్నారు.
పశువుల కాపరులు, గ్రామస్తులకు కీలక సూచనలు
పులి ప్రమాదం పొంచి ఉన్నందున పశువుల కాపరులు అత్యంత అప్రమత్తంగా ఉండాలని అధికారులు హెచ్చరిస్తున్నారు. పశువులను మేత కోసం అడవి లోపలికి, నిర్మానుష్య ప్రాంతాలకు తీసుకెళ్లవద్దని సూచించారు. ముఖ్యంగా సాయంత్రం చీకటి పడిన తర్వాత గ్రామస్తులు ఎవరూ ఒంటరిగా అటవీ ప్రాంతాల్లోకి వెళ్లకూడదని స్పష్టం చేశారు. ఎక్కడైనా పులి కనిపించినా, దాని పాదముద్రలు (పగ్ మార్క్స్) కంటపడినా వెంటనే తమకు సమాచారం అందించాలని, ప్రజల భద్రతకే తమ మొదటి ప్రాధాన్యత అని అటవీ శాఖ అధికారులు భరోసా ఇస్తున్నారు.
Click it and Unblock the Notifications
Sign in with Google
