చికాగోలో బతుకమ్మ పండుగ

చికాగోలోని తెలంగాణ ప్రజలు తెలంగాణ విమోచన దినోత్సవంతో పాటు బతుకమ్మ పర్వదినాన్ని నిర్వహించుకున్నారు. ఇది ఉత్తర అమెరికా ఆరో బతుకమ్మ పండుగ. ఈ ఉత్సవానికి పెద్ద యెత్తున ఎన్నారైలు పాల్గొన్నారు. చికాగోలోని బ్లాక్ వెల్ ఫారెస్టు ప్రిజర్వ్ లో తెలంగాణ ఎన్నారైలు ఈ ఉత్సవాన్ని సెప్టెంబర్ 27వ తేదీన నిర్వహించారు. దాదాపు 420 మంది ఈ ఉత్సవానికి హాజరయ్యారు.

బతుకమ్మలను పేర్చడానికి తెలంగాణలో వాడే గునుగు పూలు, కట్లె పూలు, తంగెడు పూలు, బీరపూలు వంటివి లభించకపోవడంతో చికాగోలో దొరికిన ఇతర పూలతో బతుకమ్మలను పేర్చారు. పూర్ణచందర్ రావు అల్లంనేని, శ్రీనివాస్ రెడ్డి సరికొండ, వెంకట్ తుడి యాంకరింగ్ చేశారు. చికాగోలో ఏటా నిర్వహిస్తున్న బతుకమ్మ పర్వదినం గురించి వెంకట్ తుడి సంక్షిప్తంగా వివరించారు. ఇది ఉత్తర అమెరికాలో ఎన్నారైల ప్రధాన ఉత్సవంగా గుర్తింపు పొందింది.