దేవేందర్ బాట పట్టిండి: ఎన్నారైలు

తూళ్ల దేవేందర్ గౌడ్ తెలుగుదేశం పార్టీకి రాజీనామా చేసి తెలంగాణ ఉద్యమాన్ని చేపట్టాలని నిర్ణయించుకోవడాన్ని తెలంగాణ ఎన్నారైలు హర్షిస్తున్నారు. దేవేందర్ గౌడ్ ను అమెరికాలోని తెలంగాణ డెవలప్ మెంట్ ఫోరం (టిడిఎఫ్) అభినందించింది. తాము దేవేందర్ గౌడ్, గుత్తా సుఖేందర్ రెడ్డి, ముత్యం రెడ్డి, చెన్నమనేని రాజేశ్వరరావు, కడియం శ్రీహరిలతో ఎప్పటికప్పుడు మాట్లాడుతున్నట్లు టిడిఎఫ్ - యుఎస్ ఎ ఒక ప్రకటనలో తెలియజేసింది. దేవేందర్ గౌడ్ తీసుకున్న సాహసోపేతమైన చర్యలను అన్ని పార్టీలకు చెందిన తెలంగాణ నాయకులు హర్షించాలని టిడిఎఫ్ అన్నది. తాము తెలంగాణ నాయకుల పక్కన నిలబడుతామని, వారిని గౌరవిస్తామని అన్నది.

తెలంగాణ కోసం తెలుగుదేశంలోని నాగం జనార్దన్ రెడ్డి, కాంగ్రెసులోని జీవన్ రెడ్డి, డి. శ్రీనివాస్ తగిన నిర్ణయాలు తీసుకోవాలని టిడిఎఫ్ అధ్యక్షుడు మధు రెడ్డి అన్నారు. దేవేందర్ గౌడ్ చర్య తెలంగాణ నాయకులకు తాము అనుసరించాల్సిన మార్గాన్ని చూపుతోందని టిడిఎఫ్ చైర్మన్ పురుషోత్తమ రెడ్డి గడ్డం అన్నారు. దేవేందర్ గౌడ్ తో తాము మాట్లాడామని, తమ సహాయం ఏ రూపంలో ఉండాలనే విషయాన్ని ఆయనతో చర్చించామని టిడిఎఫ్ ఆస్ట్రేలియా ప్రతినిధి డాక్టర్ వినోద్ రెడ్డి ఏలేటి అన్నారు. ఆంధ్ర ఆధిపత్యంలోని పార్టీలను వదిలి పెట్టాలని, తెలంగాణ రాష్ట్ర ఏర్పాటుకోసం పని చేయాలని తాము కాంగ్రెసు, తెలుగుదేశం పార్టీల్లోని తెలంగాణ నాయకులను ఎస్ ఎంఎస్ ల ద్వారా కోరుతున్నట్లు ఆయన తెలిపారు. తెలంగాణ కోసం దేవేందర్ గౌడ్, పెద్ది రెడ్డి రాజీనామా చేసినందుకు తాము సంబరాలు జరుపుకుంటున్నామని తెలంగాణ ఎన్నారై అసోసియేషన్ చెప్పింది. తెలంగాణ ప్రజలతో చేతులు కలపాలని అన్ని పార్టీల్లోని తెలంగాణ నాయకులకు అసోసియేషన్ ప్రతినిధి రవి మేరెడ్డి కోరారు.