కువైత్ లో కడప వాసుల 'సమైక్యాంధ్ర' ప్రదర్శనలు

జెద్ధా: సమైక్యాంధ్ర కోరుతూ కువైత్‌లో నివసిస్తున్న కడప జిల్లాకు చెందిన ప్రవాస భారతీయులు ఆదివారం రాత్రి తెలుగు వారు నివసిస్తున్న మాల్వియా ప్రాంతంలో కొవ్వొత్తుల ప్రదర్శన నిర్వహించారు. ఎట్టి పరిస్థితులలోనూ కూడా ఆంధ్రప్రదేశ్‌ను విభజించరాదని కోరారు. రాజంపేటకు చెందిన ప్రవాసీ ప్రముఖులు ఇందులో పాల్గొన్నారు.

ఆంధ్రప్రదేశ్‌ విభజనకు వ్యతిరేకంగా ప్రధాని మన్మోహన్‌ సింగ్‌కు వినతి పత్రాలను సమర్పించే కార్యక్రమాన్ని చేపట్టినట్లు దుబాయిలో నివసించే ప్రవాసాంధ్రుడు అర్థప్రసాద్‌ ఒక ప్రకటనలో తెలిపారు. దుబాయి, షార్జాలతో పాటు ఒమాన్‌ నుంచి కూడా అనేక మంది ప్రవాసాంధ్రులు విభజనకు వ్యతిరేకంగా ప్రధానికి వినతి పత్రాలను పంపిస్తున్నట్లుగా ఆయన చెప్పారు. త్వరలో దుబాయిలో ఒక సమావేశాన్ని కూడా నిర్వహించనున్నట్లు పేర్కొన్నారు.